WILLEMSTAD – Dia 2 di Mart último, Asosashon di Restorantnan, CRA, a tene un reunion ku GMN, pa interkambiá ideanan. Manera ta konosí GMN ta enkargá ku kontrol riba establesimentu nan, entre otro restorantnan tambe. Aki ta kontrolá si tur kos ta bai segun spesifikashon stipulá i higiena ta hunga un ròl importante.

Hopi bes tin mal komprondementu entre e personal di GGD i e doño di restorant (òf manager) ora un kontrol ta wòrdu hasi. GGD ta hasi uso di un lista ku diferente tópiko riba dje i e restorant ta risibí punto riba kada un artíkulo riba e lista. Un skor bou di 90 ta wòrdu kalifiká komo ménos bon i e establesimentu lo tin kos pa drecha, kual GGD ta duna instrukshon riba dje.

Den e reunion aki, CRA i GMN a diskutí kon por koperá ku otro mas tantu, pa asina por alsa kalidat di higiena den restorantnan, pero tambe riba treinen, prosedura nan i otro tópikonan entre otro e sistema di kùr i kon den futuro serkano lo por hasi esaki “online” i finalmente pa yega na e Sistema di “HACCP” (Hazard Analysis and Critical Control Points) kual ta un sistema kaminda for di produkshon di e kuminda te na final ta tene kuenta ku kosnan ku por bai robes pa asina evitá ku e kuminda ta bira un produkto peligroso ku por hasi hende malu.

Den e kombersashon ameno i informativo a bini na e konklushon ku trahando  konhuntamente ku otro, por yega na un sistema bon kontrolá, ku informashon balioso pa miembronan di CRA i no miembronan den e sektor di restorant.

Tambe a palabra ku konhuntamente lo traha riba un seyo di kùr (keurmerk) pa asina kliente sa ku e establesimentu ku ta karga esaki ta un lugá kontrolá ku ta kumpli ku e rekisitonan stipulá.

 

LAGA UN KOMENTARIO

Please enter your comment!
Please enter your name here