Reunion di AMAK a konkluí ku mester atendé asuntu di artistanan no lokal den Karnaval

WILLEMSTAD.- Ayera nochi a tuma lugá un reunion èkstra ordinario di AMAK kaminda lo mester a atendé dos punto di agènda. E promé, e dispensashon pa artistanan internashonal por presentá den luna di desèmber i temporada di Karnaval 2020. E di dos punto tabata Festival di Tumba 2020.
Despues di reunion ‘DEN E BEMBE’ a kombersá ku Feco Gomes, presidente di AMAK ku a sali indiká ku un biaha mas e ta desepshoná pa e kantidat di miembro ku a presentá na e reunion. Un total di 17 hende so a firma e lista di presensia.
“Ayera nochi a atendé solamente e promé punto debí ku e kordinadó dje komishon ku lo mester a tene un presentashon pa loke ta trata e punto di Festival di Tumba, Gregory Colina pa motibu di salú no por tabata presente”, asina Feco a kuminsá splika.
E promé punto di agènda a keda atendé i pa e miembronan no tin opheshon pa entre otro músikonan yu di Kòrsou residensia den eksterior presentá durante dje periodo. A duna e ehèmpel di músikonan di Cache. Un artista ku a keda menshoná den e reunion ta e rapper ‘Poke’ ku ta pendiente pa presentá durante di Gran Marcha. Ounke e artista ta nasé na Ulanda i tin nashonalidat ulandes, miembronan di AMAK ta di opinion ku mester evitá ku e artista lo tin ku presentá den marchanan di karnaval, ku eksepshon apertura di Karnaval.
‘Loke ta biba bou dje músikonan ta esei nos ta vosiferá i duna nos konseho na Minister’, asina Feco a indiká.
Finalmente a keda disidí ku AMAK lo tuma kontakto ku Minister di Hustisia pa haña un reunion ku e Minister pa AMAK duna su konseho i splika su punto di bista pa loke ta trata e atmishon di artistanan internashonal durante dje periodo di desèmber i temporada di karnaval.

SHARE

LEAVE A REPLY