WILLEMSTAD.– Djaluna dia 9 di desèmber último, Reunion General di Asosiashon di Músiko a bai di akuerdo ku proposishonnan ku a keda presentá pa e komishon enkabesá pa Gregory Colina.
Manera ta konosí, durante General Èkstra Ordinario di AMAK 120819, a tuma e desishon pa forma un komishon konsistiendo di Srsnan Gregory Colina, Ravello Antoin, Gileon Garmers i Ike Jesurun, ku mester a revisá reglanan di Festival di Tumba i kon pa mehorá esakinan i tambe pa bin ku otro proposishonnan general pa selebrashon di e 50 edishon bira algu grandi.
Durante di e reunion general di djaluna dia 9 di desèmber último, a repasá e rekomendashonnan ku a keda presentá i despues di a pasa riba e diferente puntonan aki, sala a bai di akuerdo ku e siguiente rekomendashonnan.
Sekretario Ehekutivo
A bai di akuerdo pa nombra Sr. Gileon Garmers Sekretario Ehekutivo di Hurado. Huntu ku su trabou di hurado di Letra i
Melodia tambe e lo bai keda enkargá ku e parti organisatorio di hurado.
E kuerpo ehekutivo di hurado lo konsistí pues di e siguiente funshonnan: Presidente, Vise presidente , sekretario, un kordinando atministrativo i un “time keeper”.
Hurado
A bai di akuerdo pa trese un separashon den e sekshon di hurado di Letra i Melodia. Esaki ta pa trese mas klaridat den lo siguiente:
E sekshon aki lo keda formá pa 5 miembro: Letra kreativo / Original (50 punto);
Letra Bon basilon (25 punto); Melodia pegagoso / Fásil (25 punto); Melodia aspekto nobo (25 punto) i Entonashon (75 punto).
Si analisá esakinan nos por mira ku ta diferente kriterio, di hopi peso na puntuashon ta wòrdu huzgá den e sekshon aki.
Husga letra ta kompletamente un otro asuntu for di entonashon i liñanan melódiko i ta nesesario pa pone miembronan di hurado, ku ta musikalmente bon eduká pa husga melodia entonashon i areglo.
Tambe komishon ta bai proponé un kriterio mas ku mester aparesé den e lista aki: Estilo di interpretashon (Zuai di Tumba). Pa ilustrá lo por tin un senario kaminda ku un intérprete ku sigur ta kanta 100% den tono, artikulá zùiver, bon timbre di bos pero simplemente e NO ta kantando den e zuai di Tumba.
Tumba Original
Reunion General a bai di akuerdo pa e Tumba Original wòrdu huzgá di e siguiente forma: A1 : Letra kreativo / original (50 punto), D1: Melodia aspekto nobo (25 punto) i C2: Areglo kreativo / original (25 punto).
Premio Betty Doran: A1: Letra kreativo / original (50 punto) i A2: Letra bon basilon (25 punto). Tumba chistoso: Lòs for di tur puntuashon i skor
Plagiat / Entrega di keho etc.
Kualke miembro di hurado por pone Presidente di hurado na altura di plagiat durante festival. Presidente lo evaluá i tuma akshon.
Sala a bai di akuerdo ku si un partisipante ku konstatá plagiat, e tin ku entregá un keho ofisial, kompaña pa un PRUEBA pa mas tardá djaweps promé ku djabièrnè final di Tumba. Presidente di hurado i su tim, lo evaluá i analisá esaki i tuma un desishon.
Durashon di piesa / lus / timer
Lo mantené e lusnan tradishonal. Tambe lo introdusí un timer digital riba pantaya komo pa públiko .
Tèmpo di Tumba
E tumba mester ta skibí den kompas di 6/8 i e tèmpo ku ta interpretá un Tumba por tin un velosidat di entre 175 pa 195 riba metrónomo.
Próksimamente lo sigui mas informashon, pa asina tur kompositor, kantante, agrupashon musikal, músikonan i públiko en general komprondé e kambionan aki, ku ta na bienestar di kresementu di Festival di Tumba 2020.
