MADRID, AP.- Un reunion sekreto ku a tuma lugá algun dia pasa na un airopuerto internashonal di Madrid entre dos funshonario di rango haltu di Spaña i Venezuela a sòru pa un tormenta polítiko i e partidonan konservadó ta preshonando gobièrnu iskierdista pa divulgá kompleto kiko a pasa.
E visepresidente venesolano Delcy Rodriguez, e man poderoso di presidente Nicolas Maduro ta inkluí den un lista di sanshon di Union Oropeo i tin prohibí pa drenta teritorio di kualke pais miembro di e bloke. Apesar di esei el a kombersá den e promé oranan di djaluna ku Jose Luis Abalos minister di transporte di Spaña i figura klave di partido sosialista, i ku a keda revelá riba e página di wep di notisia spañó Vozpopuli.
Un fuente di polis ku tin konosementu di e kuestion aki a komentá ku The Associated Press ku Rodriguez a yega djaluna mardugá den un buelo prosedente di Caracas. Pero e funshonario ku a pidi pa no keda identifiká debí ku e no ta outorisá pa diskutí e tema, a bisa ku Rodriguez no tin pèrmit pa pone pia riba teritorio spañó òf kualke teritorio oropeo.
E registronan di e buelo ku AP a mira ta mustra ku e avion priva a realisá un buelo anochi di e kapital venesolano pa Madrid. E mesun avion a lanta djaluna atardi bek di e kapital spañó i a baha ménos di kuater ora despues na Estambul.
Vozpopuli a informá ku e reunion entre Abalos i Rodriguez a tuma lugá den e avion i e vise presidente venesolano i su ekipo a keda un ratu den e terminal VIP di e airopuerto.
