Rhuggenaath: Los petishon yudansa 3e tranche for di lei konsenso

WILLEMSTAD.- Premier Eugene Rhuggenaath ta yama danki na gobièrnu di Ulanda pa e echo ku a duna yudansa na Kòrsou di manera ku por a atendé ku e krísis di Covid-19. Despues di e reunion ku gabinete ulandes e premier di Kòrsou a splika ku el a bai Ulanda pa atendé ku e desaroyonan ku a surgi despues di kondishonnan severo ku Ulanda a pone riba mesa.

Manera ta konosí loke ta na diskushon ta e 3 tranche di sosten finansiero den kuadro Covid-19,  ku sosten pa presupuesto di gobièrnu di Kòrsou i tambe sosten na empresanan pa nan por mantené empleadonan. Tin kondishonnan mará na e petishon aki. Na promé lugá kondishonnan mará na e di dos tranche ku ta enserá redusí e pakete di kondishon laboral di Konseho di Minister, Parlamento i ámtenarnan.

Inkluso mester a bai di akuerdo ku proposishon di lei di konsenso den kual lo establesé un entidat pa Karibe. E motibu pa kiko premier a opta pa bai Ulanda ta pa personalmente e por deliberá ku Ulanda riba e asuntunan aki. Prome ku yega na un lei di konsenso mester tin deliberashon i mester bai Parlamento i órganonan di konseho. Ta djaluna último a risibí e pakete ku e indikashon ku pa awe djabièrnè mester a duna kontesta. Tambe Ulanda ke bini ku un entidat ku lo tin un outoridat ku nan por determiná maneho i tuma desishon riba proyektonan ku ta keda inisiá i meskos alokashon di fondo. Segun Kòrsou esei ta empugna kontra leinan di pais aki. E proposishon di lei aki no ta aseptabel.

Premier Rhuggenaath a bisa ku a proponé Ulanda pa trata e petishon pa e di tres tranche los i duna mas espasio pa atendé ku e proyekto di lei di konsenso. Mas detaye den edishon di EXTRA.

 

 

 

SHARE

LEAVE A REPLY