WILLEMSTAD.- Otro aña eskolar a kuminsá ku mesun problemanan. Un di e problemanan aki ta skarsedat di maestro di skol. E problema lamentablemente no ta birando mas chikí tampoko.
E aña aki skol a habri Direktiva di Skolnan Katóliko (RKCS), ku ta e direktiva di skol mas grandi na Kòrsou, ku 16 vakatura. Tin un 1 vakatura na enseñansa di fundeshi i sobrá tur ta na skolnan avansá. Asina ta direktor RKCS, Royla Pierre ta indiká den e podcast 3’or ku Gino.
E ta bisa ku e situashon ta hopi pèrfelu. Ta mira awor asta problema ku vakatura pa maestronan ku ántes no tabatin skarsedat di dje. Ta trata aki di por ehèmpel pa duna idioma manera hulandes i ingles. Maestronan pa duna matemátika, ekonomia, i informátika semper tabata difísil pa haña.
E problema ku skarsedat di maestro ta di algun aña kaba. Pierre ta identifiká algun faktor ku a empeorá e situashon. Unu ta ku poblashon ta embiehese. E areglo di VVU ku gobièrnu a bini kune tambe a kousa ku un grupo di maestro a baha ku penshun i ni maske nan ke a keda yuda, nan no por pasobra e areglo no a permití esaki. “Akinan tambe a pèrdè hopi boluntat di penshonadonan pa keda yuda.”
Maske ku turismo ta bai bon, Pierre ta sigui bisa, tin hopi otro área di Kòrsou ku no ta bai bon i hendenan ta bai buska un mihó futuro den eksterior. Despues ku Refineria Isla a baha su personal por ehèmpel e sla a bin dòbel pa enseñansa.
Kasá di maestronan di skol a pèrdè trabou i a bai traha den eksterior manera na Merka, Canada, Hulanda i tambe Boneiru. E yunan tambe a bai, pues skolnan a pèrdè maestronan i nan yunan ku ta alumno. E hendenan aki a logra haña un mihó futuro den eksterior i a disidí di keda pasobra no ta nota ku nan a bini bèk.
Segun Pierre ta mira tambe ku tiki tiki e tendensia di trahadónan ku ta skohe pa sali for di enseñansa ta kontinuá. Tin di nan ta skohe pa keda Kòrsou, pero no ta keda duna un man den enseñansa. Segun e direktor di direktiva di skol esaki ta un problema mundial, i no di Kòrsou so.
Sinembargo Pierre ta mustra ku otro paisnan ta buska alternativa kon pa kontrarestá e skarsedat di maestro. Na Kòrsou e ta sinti falta di un plan. “A identifiká e problema, pero kiko ta e plan?”
Pierre ta mustra mas aleu ku RKCS mes a kuminsá 2 aña pasá ku un kolaborashon ku Universidat di Kòrsou den un intento pa kontrarestá e situashon. Ta paga pa mas ku 40 persona pa sigui e estudio di maestro pa enseñansa di fundeshi. E estudio ta pisá pasobra ta trata di hendenan ku ta traha i studia pareu. Ta spera ku aki 2 aña ta kosechá for di e grupo aki, pero RKCS ta spera di mira un plan nashonal pa hasi e trabou den sektor di enseñansa mas atraktivo.
Un ehèmpel ku Pierre ta menshoná ku el a tuma nota di dje ta, ku na sierto estado na Merka a introdusí 4 dia di trabou pa maestronan di skol. Di e forma aki, e ta bisa, por repartí e maestronan mas mihó riba e 4 dianan aki, na lugá di 5 dia. Tin estado tambe ku a hasi e orario di skol mas largu.
Kon presisamente e sistema ta funshoná, segun Pierre ta algu ku mester studia mas profundo. Kompará ku Kòrsou tin kosnan diferente manera e tempu i kondishon di e skolnan, e ta mustra mas aleu. “Pero, semper tin un solushon.”
“Mi ta kere nos mester sinta huntu i identifiká un plan ku por enkaminá pa Kòrsou. Esaki mi ta sinti falta di dje. Skarsedat ta un echo, pero kon ta solushon’é?”
