WILLEMSTAD.-Kriminalidat relashoná ku arma di kandela i tráfiko di hende ta e reto di mas grandi den e region Karibense. Esaki a sali na kla durante e segundo reunion regional di ret di analistanan di inteligensia kriminal, ku a tuma lugá na Kòrsou. Mas di kuarenta analista for di henter e region Karibense a reuní durante tres dia pa fòrsa e kolaborashon entre Kuerponan di Polis.
Pais i teritorionan ku a partisipá ta inkluí Anguilla, Antigua i Barbuda, Aruba, e Islanan Britániko di Islanan Virgen, Hulanda Karibense, Islanan Caiman, Kòrsou, Repúblika Dominikana, Guyana, Saint Martin, Sint Maarten, Sürnam i Hulanda.
Pa motibu di e éksito di e promé RNA, ku a tuma lugá aña pasá na Sint Maarten, e Kolegio di Hefenan di Kuerponan di Polis den e region Karibense di Reino Hulandes a disidí pa ripití e evento aki, pa motibu di e importansia di kolaborashon regional.
‘E desafionan ku nos ta enfrentá ta kompleho i inter relashoná. Esaki ta pidi un manera di traha konhunto i koordiná,’ segun señor Raymond Ellis, Hefe di Kuerpo di Polis di Kòrsou, den su palabranan di apertura. Ademas, señor Juri Nicolaas, ku tin e funshon di Koordinashon di Informashon, nombrá pa Hulanda den Kuadro di Konsultashon Hudisial Kuaterpartit, i Señor Carl John, Presidente di e Kolegio di Hefenan di Polis i Hefe di Kuerpo Polisial di Sint Maarten, den un diálogo ta ripití na e analistanan presente, ku e trabounan desplegá pa nan, ta hopi importante pa e islanan di Karibe por keda un paraiso.
E “keynote speaker” tabata dr. Wendell Wallace, kriminólogo di e University of the West Indies, St. Augustine. Su presentashon, titulá ‘Guns and Gun Violence in the Caribbean: Trends and Implications for the Region’, a mustra un oumento den armanan di kandela i e benta di esakinan, ku konsekuensianan sosial mas serio. Task Force Officer Stephanie Gabriel di US Virgin Islands Police Department a presentá tokante tráfiko di hende. El a splika ku e Islanan Virgin Merikano ta funshoná komo un trampolin pa migrantenan ku ta hui for di paisnan manera Europa del Este, Medio Oriente i Asia Sentral, bai direkshon di Merka. E tambe a indiká ku tabatin un oumento den boto ku migrantenan ku ta bòltu.
CARICOM IMPACS tabata presente tambe. Terrance Roopchan di Crime Gun Intelligence Unit (CGIU) a duna un bista den tendensia i desaroyonan relashoná ku arma di kandela. Profesor di violensia i intervenshon, Marieke Liem, i Geographic Profiler Bert Adriaens a trata diferente método i téknikanan pa kombatí violensia di arma di kandela. Jules Anthonia di FIOD a presentá tokante e Financial and Criminal Investigations Network (FCInet): un sistema ku ta yuda organisashon di investigashon pa traha huntu internashonalmente, di un forma fásil pa kombiná informashon.
E evento a klousurá ku un presentashon di Jeremy McDermott, ko-direktor di InSight Crime, tokante e menasa kriminal ku ta spera e region Karibense. El a pronostiká ku e menasa for di Venezuela lo keda persistí den e próksimo añanan, i ku e pais lo bira mas dependiente di aktividatnan ilegal manera tráfiko di droga i tráfiko di hende komo fuente di entrada. McDermott tambe a enfatisá ku e “cocaïne bonanza,” segun e ta yam’é, ta leu for di kaba. El a indiká tambe un oumento di envolvimentu Europeo den e tráfiko global di kokaina, ku ta buska partnernan lokal den paisnan Karibense ku tin un lokashon stratégiko pa Europa.
Tur e presentadónan tabatin un opinion komun: kolaborashon ta esensial pa enfrentá e desaroyonan aktual. RNA a duna un impulso importante pa e kolaborashon aki. A diskutí ‘best practices’ den e region i a kompartí konosementu i eksperensia. Durante RNA a bira bon kla ku tin hopi semehansa den tendensianan i patronchinan di kriminalidat den e region, i ku e nesesidat pa kolaborashon entre analistanan di inteligensia kriminal ta grandi. E speransa ta ku e inisiativa aki lo kontinuá tambe na 2025.
