WILLEMSTAD. – Kòrsou a registrá su promé kaso di asesinato pa aña 2026, ora ku den kareda di 12.30 di mardugá di 28 di yanüari, Sentral di Polis mester a despachá patruyanan ku urgensia pa un supuesto tiramentu ku tabatin riba e sitio di parker na Mambo. Na yegada di e unidat di Punda nan a topa ku un hòmber drumí abou banda di un Chevrolet Spark kòrá. E hòmber akí tabatin vários heridá di bala i mesora a pidi pa ambulans na e sitio. Ambulans a presentá rápidamente, pero no por a hasi nada mas pa e víktima. Alrededor di 02.25 dòkter di polis a konstatá morto. Ta trata di Robertico Juan Papa Martir Henriques, nasé na Kòrsou dia 18 di mei 1976.
A pidi pa e tim di TFO presentá pa realisá trabounan di investigashon tékniko. Personal di TFO a konfiská mas di 20 hùls na e sitio i a konfiská un arma di kandela i tambe e vehíkulo mirando ku e tabatin perforashon di bala.
Segun informashon ku a kompilá na e sitio, ta indiká ku e hòmber víktima tabata saliendo
for di Mambo i un persona a sorprend’é ora el a kuminsá lòs tirunan dirigí riba dje, ku a alkans’é ku e konsekuensia fatal. E persona akí tabata den un otro outo ku tabata stashoná den bisindario.
Despues di a kometé e krímen, e asesino a drenta den un vehíkulo koló skur i bai for di e sitio.
Tin indikashon ku e víktima probablemente tabatin arma di kandela den su tas i esaki a keda konfiská.
