WILLEMSTAD.- ROBIN, “ROBBY” VISSER sin ningun duda tabata un hòmber di gran balor pa nos deporte sigur futbòl. Fuera di tabata dirigente pa masha hopi aña di Sport Unie Brion Trappers, pa masha hopi aña Robby Visser tabata un dje pilarnan di Radio Hoyer, “E Solo Di Pueblo”. Su programanan tabata di nivel haltu. Kla nos tur ta kòrda su “Hoyer In” tur djasabra mainta, su narashon i konosementu di deporte. I tambe huntu ku nos tur djadumingu anochi den e prestigioso “Palco di Honor”. Pa traha e artíkulo akí na memoria di e gran amigu di deporte akí, nos a kòmbersá ku Don Angel Ramirez, èks dirigente di hopi aña di Subt, i tambe nos ruman 24/7 di futbòl, “Mau” Maria, alias “Bèk Ariba”.
…Yu di èks rèfri: Sr. Wim Visser (dfm)..
Robby su Tata ku ta Sr. Wim Visser pa hopi aña tabata rèfri di nos futbòl. Posiblemente esei por tabata e motibu di e amor inkreibel di Robby pa deporte, espesialmente futbòl. Robby mes a hunga bala, i esnan ku ta na altura a konta nos ku e tabata kiper, i ku e la hunga hopi den Subt-B. Robby su amor pa e barika helnan di Kintjan a pone ku e la djòin direktiva dje organisashon.
…Robby Den Subt…
Robby a drenta komo di sekretario den direktiva Barika hel enkabesá pa Sr. Petrus van de Veen (dfm). Despues di tempu el a bira e promé sekretario, i tabata wòrdu asistí pa Sr. Angel Ramirez. Robby pa su dinamismo i vishon tabata klave den e direktiva di Subt. Huntu ku Sr. Ada Virginie (dfm) i Sr. Richard van der Veen (dfm) nan tabata buska spònser pa muraya den Stadion. Sr. Angel Ramirez ta konta ku nan tabatin masha bon kontakto ku spònser, i ku tur siman nan tabata pèrkurá pa hiba relato pa spònser di kon ‘training’ a bai, i tambe resultado di weganan. Robby tabata klave tambe ku e futbolistanan di Subt a traha un ‘Spelersraad’, di manera ku si tabatin kualke kos ku no ta kana dje bon ei entre nan, nan mes tabata regla e asuntu sin ku direktiva mester a intervení.
…Robby Klave…
Robby huntu ku e direktiva di Subt a pèrkurá pa masha hopi kambio den Stadion Dr. Antoine Maduro. Sr. Angel Ramirez ta remarká. ”Tabata manera ku Robby tabata mira e kosnan adelantá. E kasetanan di transmishon pa Radio Hoyer i Z-86 tabata idea di Robby Visser, despues tambe el a pa pone un “plèstik” pa asina evitá ku zonido di den stadion tabata drenta den e transmishon di wega. Tabata idea di Robby i Sr. Ada Virginie pa tur 15 di desèmber monta un wega entre Subt i Willemstad, pa keda ku amistat di “Bon Bisiña” ku e tim di Willemstad”, Sr. Angel Ramirez ta rekordá.
…Honesto i Desente…
Robby tabata un hòmber hopi honesto i desente. Si, semper e tabatin su opinion. Robby tabata defendé su punto di bista semper. Tin biaha tin hende ku no tabata keda muchu kontentu, pero Robby nunka tabata pensa den enemistat. E por a diskutí fuerte, pasò e tabata para riba su punto, i su manera di mira e kos. E tabata lucha pa e kousa.
…Akademia di futbòl na radio…
Robby Visser tabata klave den “Akademia Di Futbòl Na Radio”, 1010 Radio Futbòl. Huntu ku: Louis Phillips, Frank Rosina, Edsel Evertsz i “Mau” Maria nan tabata pèrkurá pa un transmishon di futbòl di luho na radio. Tabata inisiativa di Robby Visser pa premia futbolista despues di temporada. E futbolista di aña tabata haña pasashi pa Ulanda ku tur kos pagá. Tambe tabata premia ku estadia den Hotèl aki na Kòrsou.
…Narashon “A la Perfekshon”…
Robin, “Robby” Visser tabata un “Ace-Narado”. Ku rèspèt, pasò nos tabatin hopi hende ku ta i a nara futbòl na nivel i ku grasia, pero Robby tabata deskribí kasi “ala perfekshon” loke tabata sosodé riba tereno. Mau Maria ta deskribí e narashon di Robby Visser komo un narashon ku trankilidat i limpi. Sintá na kas bo tabata sa unda e bala ta riba tereno, e hòmber di futbòl ta añadí..
…Skol di Robby Visser…
Ku plaser nos tin di rekonosé ku nos tambe tabatin e honor di a pasa den e “Skol di Robby Visser”. Robby tabatin e programa di deporte na Radio Hoyer mainta. I nos a sigui su pasonan, ku su ayudo. Tambe nos tabatin e plaser di tabatin un programa di deporte djadumingu anochi na “E Solo Di Pueblo”, “Palco di Honor”. Kla mi ta kòrda ku Robby su tim di futbòl internashonal tabata e tim Ingles Sheffield Wednesday FC. E tabata dominá futbòl, i ami tabata mas ku beisbòl, sòftbòl, bòkseo i deporte lokal. Un programa di nivel enkabesá pa Robby Visser ku despues nos a tuma ora Robby a laga para.
…Danki Robby…
Danki na Robin, “Robby” Visser pa tur loke e la nifiká pa deporte, espesialmente futbòl. E lo wòrdu rekordá semper komo un strea di narashon, ku un presishon den narashon manera un “siruhano”. Maestro, amigu drumidushi…KUMINDAMENTU BRODER…
Skibí pa: Taffy de Jongh.
