MADRID, Spaña (AFP).- Outoridatnan spañó a habri un investigashon pa trese na kla e kousanan dje robo di kabel ku ayera a kousa problema serio den tráfiko di trein den zùit di Spaña. Gobièrnu dje pais a kalifiká e suseso komo un akto di sabotahe.
“Guardia Sivil a habri un investigashon riba e robo di kabel di koper ku a afektá e ret di velosidat haltu”, segun Ministerio di Interior riba e ret sosial X, agregando ku outoridatnan ta buska pa “trese klaridat den loke a pasa i identifiká esnan responsabel”.
E robo a kousa problema serio djadumingu na sinku punto di konekshon di trein ku ta konektá Madrid ku Sevilla.
Den oranan di djaluna mainta e robo a kousa interupshon serio den e liña Madrid-Sevilla, meskos tambe Madrid-Málaga (zùit), Madrid – Granada (zùit) i Madrid Valencia (ost), afektando mas di 10.000 pasahero i por lo ménos 30 trein.
Den vários mensahe riba retnan sosial, e minister di Transporte, Oscar Puente, a kalifiká e robo komo “un akto grave di sabotahe”.
