WILLEMSTAD – Siman ta habri ku dos kaso di robo na dos lokalidat diferente di KFC i pèrdida di 4 kluis ku benta di fin di siman. Un robo plania adelantá i outoridatnan ta sospecha ku e kriminalnan a hasi uso di materialnan ku a keda hòrta algun siman pasa for di Brantwer di Barber. Segun informashon ku EXTRA a risibí e kriminalnan a bai na KFC Brievengat promé i einan via di e bentana di takeout a logra penetrá bai paden. Ku e ekipo nan pisa di brantwer a logra habri e bentana. Einan a logra bai ku dos kluis i a sali di un porta patras. Despues di esaki e grupo di kriminalnan a kue kaminda pa Sta. Maria pa einan usando e mesun método pero aki si drenta di e porta dilanti. Na e lokalidat aki di KFC tambe a bai ku dos kluis. Outoridatnan ta saka afó ku henter e operashon aki lo mester a kaba alrededor di 5or di mainta. Un operashon ku sigur tabata plania ku hopi antisipashon ya ku for di 2 di ougùstùs a hasi e promé robo di ekiponan pisa di Brantwer na Barber i ku awor a bin kulminá ku e dos robonan aki na KFC tantu na Brievengat komo Sta. Maria. Awor nan ta investigá si tin un konekshon en berdat entre e robo ei i e dos kiebro na KFC. Outoridatnan ta investigando ámbos kaso i no ta duda ku kámara di seguridat lo a kapta e operashon aki na ámbos sitio. Manera e foto ta indika e sirena di alarma si nan a logra kòrta i desaktivá esaki na Sta. Maria.
