WILLEMSTAD.- Abitantenan di Kaya Bazjan Karpata ta hasi un supliká na personal di OW pa yuda nan ku e roi den e kaya aki.
Redakshon di EXTRA a keda aserká dor di algun abitante ku ta man na kabes pa motibu di un situashon di un roi den e kaya aki. E roi enkuestion ta yená ku mata i tambe shushi i na momentu ku áwaseru kai, e awa no tin kaminda pa bai i ta yena den kas di e abitantenan.
Na momentu ku áwaseru kai e roi ta yena i basha afó kual ta pone ku e abitantenan no por drenta ni sali for di nan kas.
Mas a leu esaki ta afektá nan berpùt tambe poniendo ku awa di kloaka ta bin ariba via di nan pipanan di baño i yena den kas ku awa shushi. Abitantenan ta hasi un supliká na e instansianan konserní pa tuma nota di e situashon i pa yega na un solushon mas pronto ku ta posibel.
