Riba eksonerashon debe di impuesto
WILLEMSTAD.- Algun miembro di parlamento tin interogatorio riba e ròl di kolaboradó di minister di Finansa, Wim Nijdam den e proseso pa disidí ku ta duna eksonerashon di 3,2 miar florin na debe di impuesto. Entre otro Steven Croes PAR) durante reunion públiko siman pasá a para ketu hasiendo un kantidat di pregunta riba ròl i outoridat di Nijdam.
Segun Croes a bisa, Nijdam ta mènedjer na ofisina di akountent SOAB. SOAB ta enkargá ku kontròl di maneho i sifranan di gobièrnu. Mas i mas ta mira na diferente ministerio sinembargo, ku funshonarionan di SOAB ta tuma e ròl di (ko-) determiná i ehekutá maneho di gobièrnu loke ta e base tambe pa Croes kuestioná ròl di Nijdam.
Croes a bisa ku kontinuamente den dokumentonan ta mira nòmber di Nijdam ta bin dilanti i e ke komprondé su ròl den e proseso di toma di desishon i asta dunamentu di instrukshon na Ontvanger. P’esei Croes a puntra entre otro kon posishon di Nijdam ta reglá den Ontvanger i kon e relashon entre Nijdam i Alfonso Trona ta reglá. “For di ki tempu Nijdam ta traha den Ontvanger i kiko su funshon ta”, Croes a puntra.
Mas aleu Croes a puntra ta for di ki tempu a regla e posishon di Nijdam den Ontvanger i for di ki tempu e relashon entre Nijdam i Trona ta reglá. “Ku aprobashon i outorisashon di ken e posishon di Nijdam den Ontvanger ta reglá. Nijdam ta mènedjer na ofisina di akountent SOAB, ta kiko ta su relashon di trabou ku e minister ku a poné na Ontvanger. Kiko ta su relashon ku minister di Finansa i na Ontvanger.”
Tambe Croes ke sa ki Nijdam su outoridat na Ontvanger ta, esta si e ta meskos òf mas ku esun di Trona. “Tin un akuerdo di sekresia (‘non disclosure agreement, NDA”) firmá entre Nijdam i Ontvanger. Te kon leu Nijdam ta mira informashon konfidensial di impuesto.”
Por último Croes ke sa kiko ta Nijdam su ròl den toma di desishon pa eksonerá 3,2 miar florin di impuesto. “Ki ròl Nijdam a hunga den e instrukshon di Silvania na Ontvanger pa eksonerá 3,2 miar florin na impuesto. Ta ken a ehekutá e instrukshon, Nijdam, Trona òf Silvania. Si resultá ku e instrukshon ta kontra di lei esaki lo tin konsekuensia pa Nijdam, Silvania i/òf Trona.
Croes a bisa ku e no por kaba di komprondé sierto posishon i aktonan di koleganan parlamentario den koalishon. “Ku mi formashon, norma i balor mi ta tuma mi huramentu na serio. P’esei no por komprondé kon koleganan no ta hasi nan trabou segun nan konsenshi.”
E ta mustra ku esensia di e trabou parlamentario ta pa kontrolá gobièrnu di forma krítiko. “Si nan lo a lesa dokumentonan i pidi dokumentonan ku no a risibí serka minister, nan lo sa ku no tin un base legal pa a duna eksonerashon di impuesto.” Pa e motibu aki Croes ta puntra su mes pakiko tòg ta buska pa hustifiká algu ilegal.
“Tantu den korespondensia ku Ontvanger komo ku Fiskal di Ministerio Públiko ta bisa ku no tabatin un base legal pa e eksonerashon, pero tòg miembronan di koalishon ta hasi tur loke ta nesesario pa pasa un moshon pa sostené minister Silvania. Asta Ministerio Públiko ta hasiendo un investigashon riba echo pa wak si e aktonan ta kastigabel, pero ainda MFK, KEM i parlamentario Zita Jesus-Leito ta sigui kana ku e minister bai den un direkshon ku nan no ke ta aden”, Croes a finalisá bisando.
Foto:
… Steven Croes…
