e ‘guru’ den mundu di komunikashon
WILLEMSTAD.- Ku e mesun trankilidat ku el a hiba su bida riba e mundu aki, ku e mesun trankilidat el a despedí tambe! For di ayera famia Irausquin i e famia di korant EXTRA ta di luto, esei pa motibu dje pèrdida sensibel di nos eks direktor, sr. Ronald “Ronny” Irausquin. Sr. Irausquin (1936 – 2026) pa gran parti di nos 50 añanan di eksistensia a presentá komo kara di nos korant. Ronny, manera hopi di nos tabata yam’é pero ku e rèspèt nesesario, a karakterisá su mes komo un persona trankil, ku no ta papia hopi, pero ku si tabata ser konsiderá komo un “guru” den e mundu di komunikashon, spesífikamente esun di korant.
Prueba di esei ta ku durante su trayektoria den e sektor aki, el a fungi komo direktor i akshonista di medionan manera La Prensa, Beurs & Nieuwsberichten i Drukkerij De Stad. Kuantu di nos no a lanta na chikí i konosé La Prensa i Beurs & Nieuwsberichten presentá te na kas? Ta for di 1956 bin ariba Ronny ta den e sektor aki. Na 1976 el a koroná su karera komo empresario na momentu ku el a uni forsa ku algun otro persona i entidat pa lanta korant EXTRA. E lo no por a imaginá su mes ku EXTRA lo a dominá merkado te ku e dia djawe.
UN FIGURA DI TATA
Aparte di ser un bon empresario, sr. Irausquin tabata un hopi bon dunadó di trabou, esei ta algu ku nos tur na EXTRA por bisa sin pensa dos biaha. E tabata no solamente un doño di trabou, un direktor, sino un figura di tata pa hopi di nos. Semper su portanan tabata literalmente habrí ku nos por a kana drenta i kompartí kualke kos òf interkambiá riba kualke pensamentu. Sr. Irausquin nunka a laga EXTRA ni su empleadonan na kaya, den ningun aspekto, i semper nos a keda agradesido i orguyoso di esei. Prueba di ser un bon dunadó di trabou ta e echo ku awe EXTRA tin empleadonan ku algun dékada den servisio.
PRIVA
De su bida privá sr. Irausquin tabata un persona hopi reservá, aunke den su sírkulo di amigunan tur hende tabata sa ku e gusta piska. Pa hopi aña e yate “Paso Largo” a subi laman sea pa un paseo ku famia i amigunan òf pa aktividatnan mas serio partisipando den kompetensianan peskero organisá pa Yacht Club.
Biniendo bèk riba e loke mas e tabata stima, desafortunadamente pa motibu di malesa sr. Irausquin a hañ’é ta dal un paso atras i pasa e batuta over pa su yu Romulo kende te ku e dia djawe ta e persona na timon di EXTRA. Di parti di Staf i Personal di EXTRA, nos mas sinsero pesame na famianan di sr. Irausquin, su kasá Diana, yunan Ronald, Kenrick, Romulo i demas famianan. “Ronny”, danki di a ser un bon persona, i bo mishon ta kumplí. Sosegá na pas!
Ta ku hopi duele mi a tuma nota ku sr. Ronald Irausquin ya no ta cu nos. Mi ta pidi mi diskulpa ku mi no a presenta mi condolencia na su familiares, na e famlia di Extra, La Prensa, Beurs- en Nieuwsberichten y tur otro parti di e totalidat ku Drukkerij de Stad a mira produsi na e nivel di mas haltu pa Korsou.
Un operacion di wowo tabata tin mi kompletamente okupa e dianan aki i pesei mi no por tabata personalmente presente pa despedida manera su persona merese.
Asepta mi palabranan di kondolensia. Hopi forsa na tur miembro di familia i na tur ku ta parti di empresanan ku tabata algo mas ku djis lugar pa traha den man di sr. Irausquin, kende sin duda awor ta disfruta di e paz i felisidat eterno ku e merese.
Jeannette L. (Jenny) Cratz