BOCA RATON.- Un par di dia despues di e logro grandi kontra di Ekuador, e kiper di selekshon di Kòrsou Eloy Room, a indiká ku e partido tabata unu tremendo i ta haña great di mira tantu reakshon i sosten pero a hala atras for di media sosial pa asina por sigui konsentrá riba su tarea ku e tin. E ta kontentu ku komo ekipo nan tur a hunga pa asina por a logra e punto históriko den Kopa Mundial. E ta kere komo organisashon nan tabata tremendo den defensa komo un bloke nan tabata fuerte i hungadónan tabata habrí pa por a realisá kontra atakenan. Pues pa e for di dilanti te patras nan tabata fuerte. E ta kategorisá e wega kontra di Ekuador komo un di esnan mihó den su karera te ainda, ounke el a indiká ku kontra di Honduras tambe den Gold Cup na 2019, e tabatin 15 salbashon den e partido ei pero naturalmente esaki ta na e nivel di mas haltu. Al final e ta kontentu ku e resultado i tambe ku nan komo ekipo por a realisá e resultado huntu, asta teniendo na kuenta ku esnan di reserva ku a drenta wega i hasi e trabou i bringa te na e lastu minüt. Pa loke ta e mentalidat di e selekshon, naturalmente nan ta zuando e empate kontra Ekuador komo motivashon i pa asina nan sigui konsentrá riba nan preparashon pa e siguiente partido kontra Kosta Marfil.
Pantera Negra
Komo fanátiko di Pantera Negra, Ergilio Hato, semper Room a trata di dun’é su honor, teniendo na kuenta ku for di chikí e tabata atmir’é i naturalmente e ke bira e mesun leyenda manera Ergilio Hato tabata. E ta kere ku Ergilio Hato a nifiká hopi pa Kòrsou i al final e tambe ke hasi meskos.
Di nada pa Kopa Mundial
Eloy Room a finalisá bisando ku loke nan ta pasando aden, kuminsando for di nada na momentu ku el a yega pa aworakí den Kopa Mundial, logrando gol i punto ku selekshon di Kòrsou, e ta spera ku esaki ta e fundeshi pa por sigui bai pa dilanti. E ta kere ku ta hopi importante ku awor nan ta bai pone Kòrsou na un nivel, pa asina e generashon ku ta bini por haña un nivel haltu ku nan por sigui kompetí pa Kòrsou.
