Mas ku 800.000 tutsi a keda asesiná den 1994 na Ruanda. Un ruandes hutu ku a partisipá na e matansa, a biba añanan largu na Merka skondiendo su partisipashon den e matansa.
NEWYORK (AFP).- Hustisia di New York a akusá un ruandes di a gaña riba su partisipashon den e genosidio di Ruanda den 1994 na momento ku el a solisitá su pèrmit di residensia i nashonalidat na Merka.
Segun e akusashon, Faustin Nsabumukunzi, di 65 aña i residente di
Bridgehampton (New York), ta keda akusá di froude di visa i intento di froude di naturalisashon.
E akusado a solisitá asilo na Merka den 2003, i den 2005 a risibí pèrmit di residensia, promé ku el a solisitá dos biaha (2009 i 2015) pa siudadania.
Den su solisitutnan pa haña e dokumentonan e akusado a skonde su papel komo dirigente lokal i outor di aktivonan violensia durante e genosidio ruandes, perpetrá pa e mayoria hutu kontra e minoria tutsi. Mas di 800.000 persona a muri durante e violensia entre aprel i yüli di 1994.
Den su komparensia dilanti di wes, Nsabumukunzi a deklará su mes inosente i a keda den libertat bou di fiansa di 250.000 dòler, ku aresto na kas i GPS. Si e keda deklará kulpabel, e por keda kondena te ku 30 aña di prizòn.
Segun e akusashon, Nsabumukunzi den su pais a usa su posishon di liderazgo pa supervisá e violensia i asesinato di tutsinan den su zona lokal i tambe a dirigí gruponan di hutu armá pa mata tutsinan i alentá violashon di muhénan tutsi.
Segun dokumentonan hudisial, Nsabumukunzi a keda kondensá den rebeldia pa un tribunal ruandes, akusá di genosidio.
