WASHINGTON (AFP).- E hefe di diplomasia norteamerikano, Marco Rubio, ta mantené kòmbersashonnan sekreto ku e ñetu di Raúl Castro, den pleno preshon di Merka riba Cuba, segun e wèpsait norteamerikano Axios a publiká ayera.
Presidente Donald Trump a bisa di forma habrí di ta konsiderá Cuba komo “un nashon bankarota” i a hasi un yamada na La Habana pa sera un akuerdo ku Merka. Trump, sinembargo, a deskartá e idea di un preshon ku e meta pa tumba e gobièrnu di Miguel Diaz-Canel.
Segun Axios, Rubio, kende a nase na Merka di mayornan kubano, a mantené kòmbersashon ku Cuba “riba e nivel di mas haltu”, pero e gobièrnu norteamerikano ta hopi deskreto i ta nenga na ofresé e mas mínimo di detaye riba e kontenido i ku ken el a papia. Departamento di Estado i embahada kubano na Washington a nenga na komentá riba e reportenan di Axios.
Den yanüari, Washington a imponé un blokeo petrolero kontra dje isla, despues dje éksito ku el a logra ku e konfiskashon di eksportashonnan di krudo for di Venezuela. Cuba a denunsiá e maniobra i despues di esei a mustra di ta dispuesto na negoshá. E isla ta sufri di un eskases grave di kombustibel i ‘blackouts’ ta algu konstante. Ademas di esei, Merka ta mantené un embargo komersial pa dékadanan kaba ku e isla.
Raúl Castro (94) ofisialmente a retirá di tur funshon di gobièrnu, pero ta sigui ta un figura sentral di poder i ta konservá e lealtat di forsanan armá. El a sinta na lugá di su ruman Fidel den 2006 i a trese reformanan grandi, pero sin sede poder i tampoko yama elekshon.
