WASHINGTON, USA (AFP).- E hefe di diplomasia norteamerikano, Marco Rubio, a kalifiká komo “tirania” ku e servisionan di inteligensia interior di Alemania a referí na e partido Alternativa pa Alemania (AfD) komo partido “ekstremista di derecha”.
“Alemania a duna su agensia di spionahe podernan nobo pa vigilá oposishon”, segun Rubio a skirbi riba e ret sosial X. “E kos ei no ta demokrasia: ta tirania disfrasá”, el a agregá i a pidi pa outoridatnan “dal un paso atras”.
Segun Ofisina di Protekshon di Konstitushon a bisa den un komunikado, e ideologia di AfD ku “ta desbalansá gruponan kompleto di e poblashon den Alemania i ta atentá kontra su dignidat humano”, no ta “kompatibel ku e órden demokrátiko fundamental”.
Den elekshonnan legislativo di 23 di febrüari, AfD a registrá un avanse históriko i a dupliká su resultado anterior, risibiendo mas ku 20% di e votonan.
For di e momentu ei, e partido, fundá den 2013, inkluso a superá den algun enkuesta e demokristiannan di CDU, e partido konservador di Friedrich Merz ku djamars próksimo lo keda instalá komo kansier.
“E ekstremistanan berdadero no ta e popular AfD, ku a keda na di dos den elekshonnan resien, sino e polítika mortifero di inmigrashon di fronteranan habrí dje establesimentu kontra kua AfD ta oponé”, segun Rubio a bisa.
No ta e promé biaha ku e gobièrnu di Trump ta interferí den polítika aleman, loke ta trese rabia na Berlin.
E vise presidente JD Vance a sorprendé alemannan i europeonan en general ku un diskurso pronunsiá na Munich medio febrüari, den kua el a bisa ku libertat di ekspreshon ta “retrosediendo” na Europa, partikularmente na Alemania.
