MARCO RUBIO; Sekretario di Estado.
QUITO, Ecuador (AFP).- Sekretario di Estado di Merka, Marco Rubio, a bisa ayera ku e lucha di México kontra di organisashonnan di droga “ni djaleu ta sufisiente” i a atvertí ku su pais lo enfrentá e gruponan ei “di un manera òf otro”. Presidente iskierdista di México, Claudia Sheinbaum, tin un relashon iregular ku e mandatario norteamerikano Donald Trump, kende na vários okashon a presentá e idea di un intervenshon militar di Merka na e otro banda di frontera.
“Tin teritorionan na México ku no ta keda goberná pa Estado”, segun Rubio a ekspresá na Quito den kuadro di un gira pa Ecuador, Colombia i Perú. E diplomátiko di orígen kubano a elogiá e esfuersonan di México kontra dje kartelnan, pero a insistí ku ainda tin hopi kos pa hasi i a manifestá e intenshon di Merka pa aktua huntu ku outoridatnan mehikano pa kombatí nan.
Nos speransa i nos intenshon ta pa hasi esei den un asosiashon ku México. Esei ta idea. Pero, eventualmente, e menasa ei mester keda enfrentá di un manera òf otro”, el a deklará.
Washington a oumentá su preshon riba su bisiña inkluso akusando e gobernador dje estado di Sinaloa, miembro di e partido di gobièrnu, pa supuesto relashon ku narkotrafikantenan.
Rubio a bisa ku e gruponan di droga tin e kapasidat pa desafiá e outoridat dje Estado ku asesinato di kandidato-, polítiko-, hues- i periodistanan. Tambe el a atvertí ku e gruponan ei ta representá un menasa kresiente na frontera ku uso di drone i retnan di tráfiko sofistiká pa trasladá droga- i migrantenan.
