NAIROBI, KENIA, AP.- E ruman keniano di presidente Barack Obama a bisa djamars ku e ta apoyá e kandidato republikano Donald Trump i no a demókrata Hillary Clinton. Clinton ta konta ku e respaldo di e mandatario merikano.
Malik Obama a splika na The Associated Press ku e ta kere ku Trump tin hopi energia i ku e ta papia e kosnan manera nan ta.
“Clinton no ta honesto dor di bisa ku e no a revelá ningun informashon konfidensial i a hasi esaki. I mi no ta mira e persona aki bira presidente di Merka”, asina el a informá. “Mi no ta apoyá matrimonio entre personanan di mesun sekso. Mi ta musulman, esaki ta algu ku no ta wòrdu aprobá. Partido Republikano no ta defendé esaki”.
Malik Obama, kende ta ruman parti tata di Obama ta desepshoná ku e presidente no a hasi mas pa apoyá su famia keniano i e pais. E tata di Barack Obama tabata keniano.
“Mi ta hopi desilushoná i rabiá. Na momentu ku el a bira presidente nos tabatin speransa ku e lo hasi muchu mas pa nos i pa e pais”, asina el a afirmá. “Mi no ta haña ku el a kumpli ku esaki”.
Durante fin di siman, Trump a ekspresá su sorpresa pa e anunsio di Malik Obama.
Malik Obama, di 58 aña, a kousa kontroversia na aña 2010, na momentu ku el a kasa ku un adolesente, su terser kasá. El a partisipá pa goberná Distrito di Siaya, su region natal, na 2013 pero el a pèrdè. El a indiká ku e ta desepshoná ku su ruman no a respald’é.
E tata di Obama, i di Malik Obama a muri den un aksidente di outo na aña 1982, lagando tres kasá i seis yu i un yu muhé. Tur yu, ku eksepshon di Malik i esun mas chikitu, George Obama, ta biba na Gran Bretaña òf Merka.
