MOSCOW, RUSIA, AFP.- Rusia a akusá Merka di a organisá un atake ku drone ukraniano kontra Kremlin pero Washington a ninga su implikashon den esaki.
Djárason Moscow a sigurá ku a konfiská dos drone ukraniano dirigí kontra Kremlin i a denunsia un intento di asesinato di presidente Vladimir Putin, akusashonnan ku Kiev ta ninga i kuestioná pa Washington.
“E desishon di Kiev i Washington pa ninga kualke responsabilidat ta kompletamente ridíkulo. E desishonnan di e tipo di atakenan aki no ta wòrdu tuma na Kiev pero na Washington”, asina e bosero di Kremlin Dmitri Peskov a bisa.
E bosero a añadí ku “Kiev ta hasi solamente loke e wòrdu komandá i Washington mester komprondé klaramente ku nos sa esaki”.
Kas Blanku a ninga su implikashon den e supuesto atake i a bisa ku e deklarashonnan di Peskov ta un engaño.
Aparte di e intento di atake kontra Kremlin, dos refineria di petroli a keda ataka pa algun drone na sùitwèst di Rusia, serka di Ukrania.
E hefe di diplomasia di Union Europeo, Josep Borrell a pidi Rusia pa no usa e supuesto atake kontra Kremlin komo preteksto pa intensifiká su atake militar den Ukrania.
