Riba e potrèt por mira e edifisio di gobièrnu ukraniano ku a keda alkansá durante di un bombardeo ruso den oranan di djadumingu mardugá..
KIEV, Ukrania (AFP).- Ayera Rusia a lansa su ofensiva aéreo di mas grandi kontra di Ukrania for di despues ku guera a kuminsá, ku un kantidat di drones i misilnan ku a laga por lo ménos sinku morto na diferente punto dje pais i a provoká un kandela den e sede di gobièrnu den Kiev. E presidente ukraniano, Volodimir Zelenski, a bisa di ta konta ku un reakshon kontundente di parti di Merka despues dje atake.
Na Washington, e presidente norteamerikano Donald Trump, puntrá pa un periodista si e ta dispuesto na bin ku sanshonnan kontra di Rusia, a kontestá: “Si , lo mi hasi esei”.
Rusia a intensifiká su ofensiva kontra di Ukrania for di despues ku presidente Vladimir Putin a reuní ku Trump na Alaska riba 15 di ougùstùs den un kumbre for di kua no a surgi ningun avanse den direkshon pa para e guera. E atake riba e sede di gobièrnu di Ukrania, un kompleho grandi den kurason di Kiev, ta e promé dje tipo aki den tres aña i mei dje konflikto, i Zelenski a atvertí ku esei solamente lo prolongá e guera.
Un periodista di AFP a mira vlamnan riba dak dje edifisio kaminda e konseho di minister ta reuní i tambe huma na e otro punta dje kapital ukraniano. “Pa promé biaha ku e dak i e pisonan mas haltu ta sufri daño debí na “un atake enemigu”, segun e promé minister Yulia Sviridenko, riba Telegram.
Sviridenko a informá ku no a registrá víktimanan den e edifisio. E servisionan di emergensia a indiká den oranan trempan di ayera tardi ku a logra paga e kandela.
“Ta importante ku e aliadonan reakshoná riba e atake aki”, segun Zelenski den su mensahe riba retnan sosial. E atake tambe a daña vários edifisio haltu den e kapital, segun servisionan di emergensia. Segun forsa aéreo ukraniano, e atake aki, ku mas ku 800 drones i 13 misil lansá, ta e ofensiva ruso di mas grandi for di despues ku e guera a kuminsá den febrüari di 2022.
Mòsku no ta duna señal di ke para e guera i ta mantené su eksigensia di mas tereno ukraniano pa un akuerdo di pas, kondishonnan ku pa Ukrania ta inaseptabel.
