Miembronan dje delegashon ukraniano ta bandoná sala di reunion despues di un enkuentro ku e delegashon ruso. E promé kòmbersashonnan a konkluí sin akuerdo pa pone fin na e guera.
ISTANBUL, Turkia (AFP).- Rusia i Ukrania ayera a akordá un importante interkambio di prezunan i a duna di konosé ku nan lo papia riba un posibel stòp di e guera i un eventual reunion entre nan presidentenan. Tabata e promé negoshashon dirèkt entre e dos paisnan den tres aña di tempu.
Miéntras ku e negoshadó hefe ruso Vladimir Medinski a bisa di ta “satisfecho” i dispuesto “na sigui ku e kontaktonan” ku Ukrania, e parti ukraniano a akusá Mosku di a plantia petishonnan teritorial ku ta inaseptabel.
E kòmbersashonnan na Istanbul, ku a dura poko mas ku 90 minüt, a laga masha poko indikashon di avansenan importante pa pone fin na e guera.
Kiev tabata buska “un paro inkondishonal di e guera” pa kaba ku e konflikto ku a destruí zonanan grandi di Ukrania i a pone ku miónes di hende a hui.
Mòsku sistemátikamente a rechasá tur e petishonnan, i e úniko akuerdo konkreto parse di ta un akuerdo pa interkambio di 1.000 prezu kada un.
E kòmbersashonnan, den palasio Dolmabahce di Istanbul, a tuma lugá den ousensia dje presidente ukraniano Volodimir Zelenski i djesun ruso Vladimir Putin, ku a ordená pa su ehérsito invadí Ukrania riba 24 di febrüari di 2022.
E delegashon ukraniano tabata enkabesá pa e minister di defensa, i e ruso pa un asesor di segundo nivel. Tur dos tabata kompañá pa mediadónan turko.
