MOSCOW, RUSIA, AFP.- Rusia i Ukrania a akusá otro mutuamente djadumingu ku bombardeo di e sentral nuklear di Zaporizhzhia, esun di mas grandi den Europa, situá den un zona kontrolá pa e ehérsito ruso na sùit di Ukrania.
Durante e último lunanan, Moscow i Kiev a akusá otro vários biaha ku bombardeo di e sentral.
E direktor di e organismo Internashonal di Energia Atómiko (IAEA), Raffael Grossi, a atvertí pa un situashon “ekstremadamente grave” i a konsiderá ku e atakenan di e sentral tabata “apsolutamente deliberá i selektivo”, den un entrevista ku e kanal franses BFMTV.
E ministerio ruso di Defensa a denunsia ku “e régimen di Kiev no a stòp ku su provokashonnan pa krea un katástrofe den e sentral nuklear di Zaporizhzhia”.
Segun un komunikado di e ministerio ruso, ehérsito ukraniano a tira mas ku binti “granat di kaliber haltu” kontra e sentral.
Apesar di e bombardeonan, “e nivel di radiashon den e zona di e sentral ta normal”, segun indikashon di e ministerio di Defensa ruso.
Pero e agensia nuklear ukraniano a akusá Rusia ku e bombardeo den zona di e sentral.
E agensia nuklear Energoatom, ku a akusá Rusia ku “organisá un chantahe nuklear un biaha mas” a indiká ku a detektá por lo ménos “12 tiru den e zona di e sentral nuklear di Zaporizhzhia”.
