MOSKU (AP).- E arma stratégiko nobo di Rusia a resultá di ta burla di kualke defensa kontra misil anto na un frakshon di nan kosto, segun ofisialnan a duna di konosé e siman aki. E vehíkulo supersóniko Avangard por bula na un velosidat di 27 biaha mas rápido ku velosidat di zonido, hasiendo ku ta imposibel pa e keda interseptá, asina e Promé Minister interino Yuri Borisov a deklará na un televishon Ruso. E arma nobo aki básikamente ta hasi defensanan kontra misil inútil, segun e mandatario.

Borisov a deklará esaki un dia despues ku Presidente Ruso Vladimir Putin a mira loke el a deskribí komo e tèst final i eksitoso di Avangard i el a alabá esaki deklarando ku e ta un garantia konfiabel pa e seguridat di Rusia pa e próksimo dékadanan.

Den un tèst djárason último e arma a ser lansá for di e base misil di Dombarovskiy den e serunan na zut di e pais. Kremlin a duna di konosé ku e misil pa alkansá un blanko di práktika ku éksito te na Kamchatka, ku ta un 6.000 kilometer mas leu.

E ministerio di defensa a publiká partinan di e tèst den kual lo por mira un misil balístiko saliendo for di un sitio meimei di un kantidat di huma, aunke e no ta duna ningun imágen di e rakèt mes. Putin a duna di konosé ku e Avangard lo drenta servisio ku e Forsanan Ruso di Misil Stratégiko otro aña.

Por sierto e tèst aki ta bini meimei di un situashon tenso den e relashonnan entre Rusia i Merka pa motibu di entre otro e krísis na Ukrania, e guera na Siria i e alegashonnan di Merka ku ta akusá Rusia di a mete ku resultadonan di elekshon presidensial na 2016.

LAGA UN KOMENTARIO

Please enter your comment!
Please enter your name here