MOSCOW, AP.- E legisladornan ruso a aprobá un proyekto di lei djaweps, kual lo amplia e kontròl di gobièrnu riba internèt. oponentenan ta konsiderá esaki komo un era nobo di sensura generalisá.
E Proyekto di lei lo konstruí un sistema kaminda e tráfiko ruso riba internèt ta wòrdu konektá atraves di servernan den e pais kompleto. Esaki lo oumentá poder di agensianan estatal pa kontrolá informashon i blòkia aplikashonnan di mensahe, i tambe hasiendo e mas difísil pa usuarionan evitá restrikshonnan di gobièrnu.
E proposishon di lei a kousa protesta di míles di persona luna pasá na Moscow. E oponentenan ta bisa ku esaki lo permití Estado pa kontrolá e fluho di informashon i lo implementá blokeo di aplikashonnan di mensahe ku no interkambiá di informashon ku e pais.
Esnan ku ta sostené e medida a pone importansia riba ekspanshon di kontròl di tráfiko riba Internet. Nan a agregá ku e medida ta un defensa den kaso ku Rusia wòrdu ekskluí for di riba internèt pa Merka i otro posibel paisnan hostil.
E medida a wòrdu aprobá ku 322-15 despues di un segundo debate den kámara di parlamento.
E proposishon mester pasa pa un terser i último debate den kámara, promé ku e wòrdu firmá pa presidente Vladimir Putin.
Desde aña pasá, outoridat ruso ta purbando di blòkia e app di mensahe Telegram, kual a ninga di entrega mensahenan kodifiká di su usuarionan.
