MOSCOW, RUSIA, AFP.- Rusia a bisa ku a evakuá sentenáres di mucha for di barionan pa motibu di bombardeonan ku a intensifiká den region di Belgorod na frontera. E situashon ta wòrdu konsiderá komo “alarmante” pa Kremlin.
Despues di mas ku un aña di e invashon na Ukrania, Rusia a eksperensiá un oumento den atakenan riba su tereno, inkluyendo un invashon sin presedente siman pasá den region na sùit di Belgorod i un atake ku drone na Moscow djamars.
Outoridatnan a kuminsá evakuá muchanan na frontera di Shebekino i Graivoron, segun indikashon di e gobernador regional Vyacheslav Gladkov riba Telegram.
“E seguridat di muchanan den e dos distritonan ta hopi importante,” asina Gladkov a bisa. “Nos tur ta hopi preokupá.”
Entre tantu, tenshonnan ku Oksidente a eskalá mas ainda djasabra, na momentu ku Alemania a anunsiá ku nan lo redusí presensia diplomátiko drástikamente na Moscow, despues ku Rusia a tuma un desishon similar.
