PETUSHKI, Rusia (AFP).- Tres abogado dje defuntu opositor ruso Alexéi Navalni a keda kondená te ku 5 aña i mei di prizòn pa “ekstremismo”. Alexéi Liptser a keda kondená na 5 aña, Igor Sergunin na tres aña i mei, i Vadim Kobzev na 5 aña i mei.
Den un komunikado, e tribunal a indiká ku Igor Sergunin a deklará su mes kulpabel dje akusashonnan, kontrario na Lipster i Kobzev.
Tur tres a keda detené den òktober di 2023, tempu ku e opositor mas konosí di presidente Vladimir Putin ainda tabata na bida.
Nan a keda akusá di a partisipá den e organisashon di Navalni, e Fondo di Lucha kontra di Korupshon, konsiderá komo ekstremista na Rusia for di 2021.
Konkretamente, nan a keda akusá di a transmití pa Navalni, será na Rusia for di yanüari di 2021 te ku su morto den prizòn dia 16 di febrüari di 2024, informashon ku por a yud’e ”planifiká, prepará i kometé krímennan ekstremista” for di su sèl, segun investigadónan. Pa e akusashonnan ei por imponé kastigu di te hasta seis aña di prizòn.
Despues di inisio dje kaso dia 12 di sèptèmber, e sekshonnan siguiente tabata ku portanan será riba petishon di fiskal, apesar di protesta di e abogadonan.
Segun un dje abogadonan di defensa, Roman Karpinski, e akusashon tabata basá riba grabashon di reunionnan di Navalni ku su abogadonan tempu ku e tabata den prizòn.
Segun e abogado,esei ta konstituyé “un violashon dje sekreto profeshonal” di parti di gerensia dje prizòn, kende a pasa e grabashonnan pa esnan ku tabata enkargá ku e kaso.
Merka, Fransia, Alemania i Gran Bretaña a kritiká e kondenanan.
“Esaki ta un ehèmpel nobo dje persekushon di abogadonan defensor di parti di Kremlin den un esfuerso pa lastra derechinan humano i mishi ku estado di derecho”, segun bosero di Departamento di Estado di Merka, Matthew Miller.
