SAINT PETERSBURG, RUSIA, AFP.- Rusia a kuminsá vakuná esnan sin kas kontra Corona vírus na Moscow i Saint Petersburg segun indikashon di organisashonnan no gubernamental.
“Tin hopi hende na riesgo i ta importante pa nan haña e vakuna”, segun indikashon di Taissa Souvorova, responsabel pa e organisashon Notchlejka, kual ta yuda esnan sin kas na Saint Peterburg.
Segun sifranan ofisial, Saint Petersburg tin kasi 15.000 persona sin kas, ounke ku Notchlejka a kalkulá ku esaki ta kasi dòbel e kantidat menshoná.
E promé 40 personanan a haña e vakuna djadumingu, inkluyendo vários persona hèndikèp.
Rusia a lana un kampaña di vakunashon masivo ku su vakuna Sputnik V i ya a registrá dos mas. Outoridat a reportá mas di 4,16 mion kaso di Corona vírus, di kual 83.293 a muri.