Un edifisio ku a keda destruí despues di atake ku ‘drone’ na Kiev djadumingu
KIEV, UKRANIA, AFP.- Rusia a lansa un bombardeo ku ‘drone’ sin presedente den oranan di anochi kontra Ukrania, segun outoridat ukraniano djaluna. E atake a sosodé despues ku Trump a yama Vladimir Putin “loko” i atvertí ku Moscow ta enfrentá mas sanshon si nan kontinuá ku e atakenan. E atake ruso ta tuma lugá miéntras diplomátikonan ta hasiendo nan máksimo esfuerso pa pone fin na e konflikto pero sin niun avanse signifikante.
Desde ku Trump a yega na poder, e presidente merikano ta purbando di media pa kaba ku e konflikto, pero e no a logra nada signifikante, apesar di vários reunion di nivel haltu ku Rusia.
Durante tres anochi konsekutivo, Rusia a bombardiá Ukrania ku atakenan na gran eskala ku ‘drone’, un strategia ku a logra saturá defensa aéreo i provoká por lo ménos 13 morto djadumingu, segun informashon di outoridatnan ukraniano.
Donald Trump, kende no sa kritiká Putin, a emití un atvertensia fuerte djadumingu. “El a bira kompletamente loko. Semper mi a bisa ku e ke Ukrania kompleto, no solamente un pida, pero si e purba esaki, e lo hiba Rusia den perdishon”, asina Trump a bisa.
Moscow a bisa djaluna ku Putin ta “hasiendo loke ta nesesario pa garantisá seguridat di Rusia” i ku e bombardeonan ta medidanan di “represaya” pa e atakenan ku ‘drone’ ukraniano riba teritorio ruso.
