MOSCOW, AP.- Rusia a anunsiá djamars ku el a fortalesé su poder militar na Siria ku sistemanan ultramoderno di misil antiaéreo, despues ku Merka a suspendé su kontaktonan ku e gobièrnu ruso rondó di e konflikto sirio.
Igor Konashenkov, bosero di Ministerio di Defensa di Rusia, a bisa ku e bateria di e kohete S-300 a wòrdu spacha pa Siria pa protehá un instalashon ruso den puerto di Tartus, i barkunan armá ruso den mediteráneo. Tartus ta e úniko base naval ku Rusia tin for di Union Soviétiko.
E sistema ta fortalesé rekursonan béliko ku Rusia tin na Siria, i ku ya ta inkluí sistemanan di defensa misilístiko, S-400 i un gama amplio di otro sistemanan di kohete antiaéreo den e base Hemeimim na Latakia, na kosta di Siria.
Rusia a kuminsá un kampaña di bombardeo aéreo pa apoyá e régimen di presidente sirio Bashar Assad desde sèptèmber di 2015, loke a salba Assad i yud’é rekuperá tereno.
A desplegá e sistema nobo di misil aki e dia siguiente ku Merka a indiká ku no ta bai tin mas kontakto ku Rusia pa pone fin na e guera sivil na Siria.
E desishon aki a wòrdu tuma despues ku un tregua na Siria a kolèps, na momentu ku Rusia i Siria a lansa un ofensiva feros kontra siudat di Alepo.
