WILLEMSTAD.- Awe komunidat di Kòrsou a lanta i ser konfrontá ku e tristu notisia ku Dr. Rutsel Martha a pasa pa un mihó bida. Rutsel Silvestre Jacinto Martha a nase na 1955 aki na Kòrsou i hopi di nos a sera konosí kuné mas djaserka na momentu ku el a drenta e arena polítiko, den e kaso aki komo Minister di Hustisia, un funshon ku el a asumí di 1998 pa 2002. Martha a lanta na Kòrsou i tabata alumno di Peter Stuyvesant College, i na 1982 el a gradua na e Universidat di Leiden den e spesialidat di Derecho Públiko Internashonal i Organisashonnan Internashonal. Pero su trayektoria komo studiante no a keda te ei, ya ku despues el a gradua na American University na Washington DC ku e título di Master den Derecho Bankario i Finansiero Internashonal. El a promové na 1989 na Universidat di Leiden ku un tésis riba derecho públiko internashonal i rekargo di impuesto.
Martha a kuminsá su karera na 1983 na UNA unda el a fungi komo dosente te ku 1987. E tabata konsehero hurídiko na Banko Sentral. Dado momentu el a regresá na Washington DC unda el a fungi komo dosente di 1988 pa 1989. El a traha tambe den e departamento hurídiko di IMF. Na 1990 gabinete Liberia-Peters III a present’é komo Minister Plenipotensiario na Brussel seka e Representante Permanente di Hulanda na Union Europeo, esaki den kuadro di e status di LGO di Antianan Hulandes. El a asumí e funshon aki te 1998.
Na 1994 Martha a hasi su debut den polítika i a keda presentá riba e lista di PNP i konsekuentemente el a keda nombra komo titular di hustisia den gabinete Römer. El a keda den e mesun funshon durante gabinete Pourier III.
Na su salida Martha a asumí vários otro funshon manera e.o. serka Interpol, Fondo Internashonal pa Desaroyo di Agrikultura na Roma, alto dosente na New York University, Universidat Nashonal di Singapore. El a yega di presentá tambe den e tim di defensa pa George Jamaloodin den e kaso Maximus. Na final di su karera el a asumí e papel tambe di informador despues dje elekshon di mart 2021.
Komo un koronashon di su karera Martha a keda nombra komo Officier in de Orde van Oranje Nassau, ku ta un alto distinshon den Reino Hulandes.
