DEN HAAG.- Minister presidènt demishonario di Ulanda Mark Rutte no ta mira ningun motibu pa bini ku medidanan nobo awor aki pa loke ta trata Covid-19. Rutte ta bisa ku e sifranan di kontagio ta mustra un tendensia I bahada, pues no tin nesesidat di bini ku un otro maneho.

Si tur kos kana segun plan por spera Rutte den un konferensia di prensa djabièrnè awor, den kaso ku tin kualke kambio e lo anunsiá esakinan durante di e konferensia di prensa di djabièrnè próksimo. Tin indikashon ku tin un konseho nobo di e tim di kalamidat, pero e minister presidènt demishonario a preferá di no duna niun komentario riba esei.

Dentro di algun dia por spera ku tur kas na Ulanda lo risibi un karta kua nan por usa pa bai tuma un pakete ku ta kontené dos test ku hendenan mes por hasi na kas. E idea tras di e proyekto aki ta pa mas tantu hende ku ta regresá kas despues di fakansi por tèst nan mes na kas promé ku sali i infektá otro hendenan. Sigur den e kasonan kaminda hende no ta sinti niun síntoma di Corona. Esaki ta simplemente un kampaña di konsientisashon, asina Rutte a duna di konosé.

 

LAGA UN KOMENTARIO

Please enter your comment!
Please enter your name here