Alvienne Elizabeth Leal i Eunice de Palm Doran
Alvienne Elizabeth Leal i Eunice de Palm Doran ta miembro di Fundashon ADRA. Bou di e fundashon aki, tin dos proyekto prinsipal: ‘Share and Care’ i ‘Forma’. Eunice ta enkargá ku e parti di ‘Forma’, dirigí na mamanan hóben entre 17 i 40 aña. Alvienne, ta traha ku hóben di edat 12 te 17 aña. Resientemente, e fundashon a realisá un proyekto na Sentro di Bario Nort Sapaté, relashoná ku e programa di ‘Share and Care’.
ADRA
Alvienne ta splika ku mester komprondé kiko e nòmber ADRA ta representá: Agensia Atventista pa Desaroyo i Rekurso di Asistensia. E palabra “asistensia” tin énfasis, segun Alvienne, e fundashon ta enfoká riba duna yudansa i sostené e komunidat. ADRA ta e brasa humanitario di Iglesia Atventista i su trabou ta orientá na loke komunidat mester.
ADRA ta un fundashon global, i manera Alvienne a indiká, na Kòrsou tambe tin su representashon. Fundashon ADRA Kòrsou a keda establesé den aña 2017, i aktualmente tin 8 aña di eksistensia. E fundashon a haña lisensia internashonal, algu esensial pa por funshoná den e komunidat segun e norma internashonal. E tipo di trabou aki ta serio, no ta simplemente un kos ku bo ta hasi paso bo gusta. Bo mester di e lisensia pa partisipá den e programa internashonal i pa bo por fungi profeshonal. E proyekto ‘Share and Care’, ta un programa original di Hulanda, “Share and Care Nederlands”. ADRA Kòrsou a tuma e programa, adaptá i modifiká e pa implementá e lokal, pa duna e un sabor Karibense. Asina, e por drenta i sirbi den komunidat di Kòrsou na un manera mas efektivo.
Un brasa pa komunidat
Alvienne ta splika ku ADRA ta un taki di e iglesia Atventista, pero no ta solamente Atventista ta forma parti di e organisashon. ADRA ta traha pa tur hende den komunidat, i hopi di nan boluntario ku no ta miembro di e iglesia. E ta personanan ku ta deseá pa kontribuí den komunidat i duna ayudo kaminda mester. ADRA ta ofresé diferente tipo di sosten. Por ehèmpel, durante e pandemia di COVID-19, nan a forma un kolaborashon ku Rode Kruis pa krea paketenan di kuminda pa yuda komunidat riba nivel di alimentashon. Ademas, e organisashon ta traha ku migrantenan, pa nan por integrá i sinti mas trankil den komunidat. ADRA ta habri nan brasa, i duna espasio pa tur hende ku ke yuda. Aktual, tin dos proyekto prinsipal: ‘Forma’ i ‘Share and Care’. Aunke nan tin un toke diferente, tur dos ta sirbi ku un solo meta: yuda i fortalesé komunidat.
Proyekto Forma
Eunice ta enkargá di e proyekto ‘Forma’. E ta splika ku e programa ta un parti di un proyekto mas grandi: ‘Samen Familie Versterken’, un inisiativa di Samenwerkende Fondsen ku ta enfoká riba fortalesé famianan huntu. E programa ta trata diferente aspekto di bida familiar, i su punto di salida ta: nos sa ku e mama ta kurason di famia. E tata por ta e kabes, pero e mama ta e kurason. I kurason mester di kuido i sosten. Na e momentu aki, Fundashon ADRA ta aktivo den bario Bonam i bisindario. Na e bario aki tin hopi kas kaminda mama soltero ta kria e yu. E realidat aki, a krea e idea pa un proyekto ku tin komo meta: fortalesé e famia huntu, ku un enfoke spesial riba e mama. No ta importá si e ta soltero, kasá òf hóben. Tur mama mester di sosten, i e meta ta pa duna nan e forsa pa drecha famia i yega na un bida felis.
Eunice ta ripará ku e proyekto a krese ku diferente bario ta aserka i pidi pa e proyekto. Aunke e fundashon ta basá na Bonam, mamanan di 17 pa 40 aña ku ta biba na otro partinan di Kòrsou tambe por partisipá.
Promé fase Forma
E proyekto ‘Forma’ a kuminsá formalmente den mart di 2025. Aktualmente, Fundashon ADRA ta trahando ku e promé grupo, den un trayekto di seis luna. E grupo aki ta sirbi komo e promé fase di un plan ku e intenshon pa dura tres aña, kaminda vários grupo di mama lo pasa den e proseso di formashon i guia personal pa logra mas stabilidat den futuro.
Kada grupo ta forma un total di 20 mama. E eskoho pa tene e grupo chikí ta pa permití ku trabou ta bai mas profundo den e proseso di formashon. E mamanan ta risibí un tayer un biaha pa siman riba diferente temanan, miéntras ku nan ta partisipá den un trayekto di guia individual, kaminda un entrenadó ku por ta un sikólogo òf un trahadó sosial, ta traha ku nan riba desafio personal, plannan di bida òf tema relashoná ku edukashon i ròl komo mama.
E guia por ta enfoká riba vários kos manera: kon pa ta un mihó mama, komprondementu di e nesesidat di e yu, desaroyo den bo profeshon òf simplemente pa haña un bista den bida personal. E idea patras di e grupo ta pa krea un komunidat di sosten, kaminda un mama por yuda i inspirá otro mama. Esaki ta e motibu pa mantené e grupo chikí, ya asina pa por bai mas profundo den tur tema ku ta relevante pa desaroyo di e mama.
E fundashon ta presente na Sentro di Bario Bonam tur djárason, entre 6or pa 9or di anochi, pa e promé grupo. Pa e segundo grupo ta kubrí e mes proseso riba djaluna, den e mesun ora. Tur luna ta dediká na un tema sentral, kaminda kada siman ta bai den detaye riba un aspekto di e tema. Na komienso di e trayekto, e temanan a kuminsá ku “Mi mes”, un modelo ku ta trata salú mental, salú físiko i bienestar emoshonal. Despues ta trata “Famia”, ku ta inkluí edukashon di e yu, relashon den matrimonio i stabilidat den kas. Un otro módulo ta “Mi abilidat”, kaminda e mama ta deskubrí òf desaroyá abilidat ku e ya tin, pero kisas nunka no a tuma kurashi pa pone den práktika.
E sekshon siguiente ta “Mi salú”, “Mi talento” i “Mi sèn”. Den e parti finansiero, e mamanan ta siña kon pa generá mas entrada, pero mas importante ainda: kon pa manehá e sèn ku nan tin. Na un momentu kaminda kosto di bida ta subi konstantemente, edukashon finansiero ta esensial. E mamanan ta siña mira su finansa ku otro bista, pa por planifiká i logra mas.
Interes
Despues ku e proyekto Forma a inisiá, e organisashon a tuma paso pa lansa su mensahe via diferente medio di komunikashon. Ademas di esaki, nan a kuminsá aserka mamanan via di skol i diferente instansianan. E aplikashon pa partisipashon no a tarda komo hopi mama a ekspresá nan interes. Pa e motibu di aki tin dos grupo. E intenshon di Fundashon ADRA ta pa kontinuá ku e método di mantené e grupo chikí, pa por traha mas profundo den e formashon i krea un impakto real. Kada grupo tin dos ‘coach’ kaminda kada unu ta enkargá di 10 mama. Esaki ta permití un atenshon mas personalisá, pero tambe e ta limitá posibilidat pa amplia e grupo.
E idea ta ku ora bo yega na e mama, ku bo forma i fortalesé su kapasidat, bo ta hasi un impakto riba e yu I e pareha. Si e mama ta bon formá, bo ta mir’e e impakto bèk den komunidat.
Ora e trayekto yega tres aña, un evaluashon lo tuma lugá pa disidí kon ta sigui. Tur esaki ta dependé di e parti finansiero. E programa ta grandi i ta 100% grátis pa tur partisipante. Materialnan, konsumo, i tur otro fasilidat ta kosto di fundashon, sin niun gastu pa e mamanan mes.
Finansiamentu
Fundashon ADRA ta hopi gradesido pa por konta ku fondo di organisashonnan manera Oranje Fonds, Samenwerkende Fondsen i Kinderpostzegel. Nan a kere den e vishon i ta sostené e proyekto pa e por bira realidat. Ku nan apoyo finansiero, e programa por tuma lugá. Vários bario, manera Banda Bou, a ekspresá su deseo pa nan tambe por risibí e programa. E interes ta haltu i e nesesidat ta bisto. Hopi kas na Kòrsou tin un hende muhé na kabes di kas, i esaki ta indiká un realidat sosial ku no por ignorá. E deseo di fundashon ta pa e programa Forma kontinuá, ekspandé, i sigui ta un man pa mamanan ku tin gana di krese, desaroyá, i traha pa un komunidat mas fuerte.
Komprondé e hóben
Alvienne, koordinadó di proyekto ta splika: “Ora bo komprondé e hóben, bo ta mira ku e no ta un doló di kabes,” e ta ekspresá ku pashon. Share and Care ta un proyekto dediká spesífikamente na hóben. Na zona di Nort Sapaté i su bisindario, a ripará ku tin hopi hóben ku sierto nesesidatnan. Fundashon ADRA a tuma e inisiativa pa bai wak kiko nan mester spesífiko den e bario. E nesesidat ku a konstatá ta enseñansa riba arte, deskubrimentu i desaroyo di talento, relashon sosial, deporte, salú i manera pa sobrebibí ku dignidat den un mundu kompliká. Pero e mas importante: enseñansa pa krea un futuro struktural i positivo. Tur esaki ta kompletamente grátis. Alvienne ta gradisí profundamente e fondo i organisashonnan ku ta sostené e proyekto: ADRA Hulanda, ADRA Kòrsou, i e komunidat mes. Tur fin di aña, Fundashon ADRA ta rekolektá fondo ku ta sali for di donashon di e komunidat, i ku esei e proyektonan ta tuma lugá. E proyekto ta dividí den dos fase: un fase di preparashon i un fase intensivo. Kada fase ta dura 6 luna, pa un total di un aña. Tur djárason, e grupo ta topa den bario entre 2or pa 6or. Ora e aña di formashon kaba, e organisashon ta tuma tempu pa hasi evaluashon i disidí riba e siguiente paso. Bo no por haña supsidio sin e fase di evaluashon, paso esei ta konfirmá si e fundashonnan a logra su meta.
Balor propio
Durante e trayekto mas resien, e grupo tabata konsistí di 15 pa 17 hóben. Aunke asistensia ta variá, tin momentu tur hóben ta bini tur siman. I esei ta un indikashon ku tin un nesesidat. Segun Alvienne, e nesesidat mas grandi ku a sali den e grupo ta e falta di balor propio. “Nos a mira ku hopi hóben no sa ken nan ta, ni kon pa mira nan mes komo un hende ku ta balioso,” e ta bisa. A pone énfasis pa traha riba outo-estima: stima bo mes, rekonosé ku bo ta úniko, ku bo tin talento i bo ta nesesario riba e mundu aki. E meta di ‘Share and Care’ ta duna e hóben e materialnan i kurashi pa nan sali for di e trayekto ku konfiansa den nan mes. E programa ta habri pa tur hóben ku tin e deseo i nesesidat pa traha riba nan mes. Ta asina ku bo ta topa ku sierto hóben ku tin nesesidat adishonal, pero e proyekto no ta ekskluí niun hende.
Komprondé e hóben
Na komienso di e proyekto, Fundashon ADRA a tuma paso importante pa komprondé e hóbennan. Un investigashon detayá a tuma lugá, ku kontribushon balioso di e studiante di “Bachelor of Social Work” di Universidat di Kòrsou. Alvienne ta gradisí: “Danki pa nan dedikashon i aportashon tremendo.” E studiantenan aki a yuda bai den bario, konosé e situashon i indiká kasnan spesífiko kaminda tin nesesidat. Ademas, e proyekto a drenta skolnan, kontaktá instansianan, pa asina sigui identifiká i yega na tur hóben ku mester di traha riba nan mes. Aunke e base tabata Nort Sapaté, e no ta limitá na un solo bario. Alvienne ta bisa: “Nos ke yega tur skina di Kòrsou. E nesesidat no ta solamente na Nort Sapaté.” Hóben di Toni Kunchi tambe a drenta e trayekto, i nan motivashon ta grandi. Tin momentu kaminda hóben ta kana bin riba nan mes, sinta warda, i hasta trese otro hóbennan. E mayornan di e bario tambe ta mustra hopi interes. E energia di e proyekto tin un kontaminashon positivo. Ora bo duna e hóben un chèns pa sinti nan balor i traha riba nan futuro, bo ta pone e komunidat den moveshon.
Reakshonnan positivo
Alvienne ta bisa ku: “Ora bo tin un grupo chikí, bo no tin mester di hopi entrenadó. Pero bo mester tin hende konsistente, ku ta presente tur siman pa duna e formashon”.
Den un proyekto di guia, kontinuidat ta esensial. No por keda kambia entrenadó tur siman. Pa un hóben sinti su mes kómodo i habri pa siña, mester tin un relashon di konfiansa. Esaki ta nifiká ku e ‘coach’ mes mester traha riba dje. Eunice de Palm Doran, ku ta guia e mama den e proyekto “Forma”, ta yuda den e proyekto di ‘Share and Care’. Tur siman, e tabata fasilitá un seshon ku un tema diferente. Un luna kompletu, el a trahá ku e grupo riba e tema di presentashon personal: “Kon pa para dilanti, papia ku klaridat, i kere den bo mes.” E ta inkluí detaye importante manera postura, uso di bos, ekspreshon i lenguahe di kurpa. E hóbennan a reakshon positivamente. Nan a siña ku presentashon personal no ta solamente pa skol, sino tambe pa trabou i bida diario. Un di e hóben mes a bisa ku e seshon di presentashon tabata su parti preferí. E programa ta struktura pa stimulá diferente aspekto di desaroyo. Tur luna, un yùfrou tabata bin duna lès di arte. E hóbennan a disfrutá di e momentunan kreativo. Tabatin un dòkter ku a papia di importansia di kuida bo mes, di higiena oral te ehersisio físiko. E forma variá i aktivo di edukashon a atraé e atenshon di e hóbennan i a mantené e interes. Alvienne ta kontentu ku e reakshon. Ora Eunice a trata e parti di presentashon, un di e hóbennan ku tabata un tiki reservá a keda te na final di e trayekto. Na fin di e sekshon final, a puntra: “Kiko bo ta bai ku ne?” E hóben a kontestá: “E parti di kon pa presentá mi mes. Esaki mi a gusta mas.”
E lidernan, manera Alvienne i Eunice, ta biba ku e proyekto. Nan ta sinti e gana, e nesesidat, i e impakto di loke nan ta duna. Nan no ta simplemente fasilitadó, pero nan ta guia ku nan alma.
Ken ta e persona tras di e proyektonan?
Alvienne Leal, un di e fasilitadónan prinsipal, ta konta ku e ta relativamente nobo den e mundu. “Aña pasa mi a hasi un kambio despues di 7 aña trahando den kantor. Mi a dediká mi mes mas na komunidat i a bira mas aktivo. Mi a siña hopi for di esaki, i mi ta mashá agradesido,” e ta bisa. Alvienne ta dosente di profeshon, i e ta usá su eksperensia pa sirbi komunidat ku pashon.
Eunice de Palm Doran, tambe ta su promé proyekto ku e ta kordiná pa ADRA. Komo fasilitadó, el a haña e oportunidat pa guia un proyekto di su mes algu ku ta konektá direktamente ku su pashon personal. Eunice ta empresario, i su trabou ta inkluí duna tayer di desaroyo den kompania i ku hóben, spesífikamente riba tópikonan manera komunikashon i presentashon. E kombinashon di eksperensia i entrega personal ta krea un impakto direktamente den bida di e partisipantenan.
Fundashon ADRA ta hala atenshon ku e trabou signifikante ku nan ta hasi riba e isla, no solamente pa hóben, sino tambe pa mama ku ta buska guia i fortalesa den su ròl familiar. Fundashon ADRA ta invitá tur mama ku tin gana di traha riba nan desaroyo personal pa drenta den e grupo nobo ku ta kuminsá den yüni. Tuma kontakto direktamente ku Eunice na 524-4687 pa registrá bo mes i kuminsá forma un futuro mas fuerte.
Pa esnan ku ke sa kon por drenta den kontakto ku Fundashon ADRA, ta importante pa sa ku tin un “ADRA Desk” disponibel pa públiko. Bo por tuma kontakto via di telefòn na 670-6363. Tambe, por sigui nan trabou via medianan sosial i wèpsait, kaminda bo por keda na altura di tur loke ta tuma lugá den nos komunidat. Alvienne ta lansa un invitashon ku “Si bo ke duna bèk na komunidat, bo por duna fondo, amor, òf simplemente bo tempu pa yuda i guia. E manera aki nos ta duna bèk na komunidat i krese huntu.”
