MANAGUA, AP.- Desena di tienda na Managua, kapital di Nicaragua, a wòrdu sakeá, miéntras protestanan i disturbionan kontra reformanan di gobièrnu di seguro Sosial a kontinuá djadumingu. Gruponan di derechi humano a informá ku por lo ménos 26 persona a muri den vários dia di konfrontashon.
Imágennan transmití pa medio di komunikashonnan lokal a mustra tiendanan sakeá den e distrito oriental di e siudat, inkluyendo Walmart.
Polis no a intervení, al kontrario di aktonan fuerte kontra manifestashonnan, kaminda desena di persona a resultá heridá òf a wòrdu detené.
Medionan di komunikashon kontrolá pa estado ta kulpa e manifestantenan di e sakeonan, miéntras krítikonan ta spekulá ku a permití pa preshoná e sektor empresarial, kual ta fiha kondishonnan pa tene negosiashonnan ku e gobièrnu, inkluyendo pa pone fin na medidanan severo.
“Nos ta mirando un kaso sosial na Nicaragua, provoká pa e ousensia di e liderazgo gubernamental i e krísis di pobresa, i esaki ta un bòm di tempu den kualkier sosiedat”, asina e sosiólogo i analista Cirilo Otero a indiká.
Desde Vaticano, papa Fransisco a manifestá ku e ta “hopi preokupá” pa loke a pasa na Nicaragua i a uni ku e obispunan pa pidi pa terminá tur violensia.
E disturbionan a start komo un reakshon na presidente Daniel Ortega su labor pa reforsá e sistema di Seguro Sosial ku un kombinashon di benefisionan redusí i impuesto mas haltu.
