Chartel Rumai

Los Paranderos

…Luna di desèmber, luna di fiesta, luna di alegria, luna di músika, luna di kome bebe i luna di gaita/aguinaldo i tambú. I ken mihó pa Chartel Rumai di Los Paranderos pa konta nos di e músika dushi aki di fin di aña.

 

Los Paranderos e aña aki tambe lo bai ta hopi aktivo i kayente den temporada di gaita i fin di aña. Los Paranderos ta eksistí 13 aña kaba. E grupo ta basta grandi di 57 integrante i esaki ta bailarinnan i tokadó tantu hóben komo esnan mas grandi. Nos ta konopá na otro pa sigui padilanti. Los Paranderos a keda lantá pa tres ruman ku ta Chartel, Gino i Miro. Promé ku 13 aña nan tur tabata toka den otro gruponan. Chartel a kuminsá den gaita ku su 13 aña, un poko mas despues ku su dos rumannan ya tabata forma parti di otro gruponan di gaita. Chartel a kuminsá ku Los Caramilenjo ku Boerleider komo nan mentor. I despues e dos rumannan a sinta huntu i a disidí ku nan ta bai riba nan mes i a lanta Los Paranderos.

 

Aguinaldo òf Gaita

Hopi biaha nos ta papia di gaita i aguinaldo òf meskla nan dos den otro pero kada un ta diferente.  Segun Chartel, na Kòrsou nan ta papia di aguinaldo i grupo di gaita. E diferensia ta sinta den e sorto di muzik ku nan ta presentá. Den kaso di aguinaldo ta mas gospel i gaita ta e muzik mas kayente i alegre. Na Kòrsou nan ta toka tur dos.

 

Gaita i Aguinaldo ta muziknan hopi toká na pais bisiña Venezuela. El a keda importá einan? Chartel a splika Djasabra ku resientemente den trahamentu di un propaganda nan a hasi un investigashon i a komprondé ku tin dos historia. Tin un parti ku ta pretendé ku gaita a kuminsá na Kòrsou i instrumentonan a sali for di Kòrsou i otro ta bisa ku ta venezolano i nan a kopia parti di e tambú i transform’é den nan muzik. Pero e ta un ritmo venezolano ku aki ta hopi aktivo den dje. E muzik di gaita ta keda toká na Venezuela, Kòrsou i Aruba.

 

Por adaptá pa toka henter aña                 

E temporada ku gobièrnu ta stipulá pa toka Gaita ta òktober, novèmber i desèmber. E temporada ei tin pèrmit spesial pa toka. Pero lo no yega un fiesta di kas pero tin otro komposishonnan si ku nan por toka. Meskos ku tumba a desaroyá, Gaita tambe a desaroyá segun Chartel. El a bisa ku por toka un salsa na gaita i hopi mas i asina toka henter aña.  na Kòrsou sinembargo esei no ta den e kultura pero si nan haña e petishon nan lo por hasié i lo ahustá nan repertorio pa hasié.

 

Reglanan ta funesto

Antes por a sinti e temporada di fin di aña ku e toka nan di gaita unda ku bo bira. Esaki sinembargo a baha bastante segun Chartel. Promé ku e tabata ku Los Paranderos ta den desèmber so tabata toke. E ta kere esaki ta pasobra hopi hende a bai Ulanda, e hende ku ta gusta e gaita kisas no ta na Kòrsou mas, banda di esei tempu a bira peligroso i hende no ta sali kas mas. E mucha yònnan tin biaha no ta interesá mes den gaita. I banda di esaki tin reglanan devastador ku ta konta pa tambú pero tambe pa gaita.

“Nos tin hopi problema pa aseptá e reglanan pero mester bai ku nan ounke nan ta stroba totalmente”, segun Chartel. Reglanan semper tabat’ei, pero ántes ku nan no tabata toka mashá, esaki no tabata stroba nan, pero awor si ku nan tin hopi toká e reglanan ta stroba hopi. I pa kolmo kada bes ta bin mas regla aserka i ta bin asina na final ku nan no tin tempu pa bring’é.

“Nos ta tende ku e reglanan ku nan ta pone ta pa bon, pero kon bon asina”, Chartel a splika.

Nan ta tende por ehèmpel ku no por toka kantu di kaya mas pasobra nan ta stroba tráfiko, pero si wak un kaya manera Rooseveltweg ku sin tokamentu mes ta super drùk. A bin ku regla i regla tei pa sigui pero ta 3 luna tin di gaita i aguinaldo i nan ke pone ambiente eifó. Pueblo ta kibra ku situashon i pa kolmo ta bin ku reglanan ku ta stroba nan. Segun Chartel loke sigur ta un estorbo ta ku mester pidi pèrmit 5 dia delantá.

 

Los Paranderos tin dos kansion ku ta super pegá. Balente i Furuku. Chartel a bisa ku nan tin basta hit, nan tin CD grabá i diferente video clip. I e aña aki tambe tin un kansion nobo ku ta Tésis. E ta un kansion ku tin komo invitado Pincho Anita, konosido kantadó di tambú. E kansion aki ta zonando na tur radio emisora kaba.

Los Paranderos tin nan Fan Club ku no ménos ku 3 mil miembro ku ta hopi aktivo i ta sigui nan tur skina. I e fanátikonan ei ta pidi hopi pa Los Paranderos. I banda di esei nan ta hasi propaganda pa nan tokánan. I na tur toká tin tur e 57 integrantenan pa 13 aña kaba.

 

Toka pa amor i no ganashi                   

Chartel a bisa ku den gaita no tin ganashi pero e ta mas bien un hòbi. Den kaso di Los Paranderos nan ta un fundashon i sigur no ta bira riku di toká nan. No ta asina ku nan por kobra i paga tur integrante pasobra e loke nan ta kobra no por afford esei. “Nos ta purba struktura e preis. Den grupo di gaita ta pa amor nos ta hasié. Nos tin un tata di gaita ku a hinka den nos ku nos ta sali nos kas tur dia bai toka pa amor i hasi hende kontentu, ke men ta bendishon di dios esei ta. I e ideologia ei nos ta hiba komo grupo; tur hende ta sali nan kas ku hopi smak bin toka pasobra ta esei nos ta hasi pa 13 aña kaba”, Chartel a enfatisá.

 

Tene hóbennan aktivo

Los Paranderos a lanta 13 aña pasá pa promové e ritmo di Gaita ku e tempu ei tabata bayendo pèrdí pero awe el a kue forma bèk. Nan a lanta pa sòru pa e originalidat di Gaita keda mantené. I tambe pa tene hóbennan aktivo for di kaya. Bo no ta yudando un persona bira riku den un grupo di Gaita pasobra si dun’é mil florin mes, esei no ta hasi e grupo ni un persona riku. Si mira kon e ta na Aruba kaminda tin muchu mas grupo i tin muchu mas spònser ku aki. Chartel sa ku na Kòrsou ekonomia no ta asina bon pero e ta pidi komersiantenan pa yuda e gruponan, duna nan maske ta algu, i asina yuda e gruponan. Esaki ta yuda tur grupo pa yuda muchanan. Den kaso di Los Paranderos nan ta ful yen pero tin grupo ku no ta toka mes i p’esei e ta hasi un petishon riba komersiantenan pa yuda e gruponan ku maske ta algu. Ta nos tur ta yuda otro pasobra ora pone ambiente den kaya e ta hala kliente. Tur grupo mester di unifòrm, nan mester di pasapalu i kos di bebe. Esei ta e úniko pago ku nan ta haña komo parti di e grupo. For di e mesun sèn ei mester paga hür di instrumènt pasobra hopi grupo ku no tin nan mes instrumènt. E gruponan aki tin bon intenshon pasobra ta tene hóbennan for di kaya.

 

Transformá e grupo i toka bai gol           

Banda di nan aktividatnan fin di aña, Los Paranderos tambe a yega di partisipá na tumba. Nan ta transformá e grupo di gaita i toka tumba. Tambe nan a bai Seú i partisipá na kantadó mayó, pero e grupo transformá. E bailarinnan ta bin huntu konstante pa baila i e grupo mes ta kuminsá trein for di yüni/yüli. Chartel ta sumamente orguyoso di e grupo; for di ora aña bòltu ya e integrantenan ta kuminsá yora ku aña a kaba. Nan ke toka, nan ke kanta i nan ke baila.

 

Apoyá nos i tur grupo

Mi ta deseá tur hende dushi dianan di fiesta mi ta spera bosnan logra bosnan bon deseo, sali bin apoyá nos i sobrá gruponan di gaita i kòrda kumpra serka e komersiante i no bai ku bo djùk i keda sin kumpra serka e komersiante.

LAGA UN KOMENTARIO

Please enter your comment!
Please enter your name here