…presidente di El Salvador…
CIUDAD DE PANAMA (AFP).- El Salvador ta e pais di Amérika Latina ku ta enfrentá e deterioro mas lihé di demokrasia den último añanan, segun un informe di un entidat intergubernamental. “El Salvador ta e pais ku tin un deterioro hopi rápido den materia di indikadónan demokrátiko den e último dékada den e region”, segun Marcela Rios, direktor regional di IDEA Internashonal.
E presidente salvadoreño, Nayib Bukele, ta goberná for di 2022 ku un régimen di eksepshon ku e meta, segun e gobièrnu, pa kombatí gènnan. E sistema ei, ku ta permití arestonan sin órden hudisial, ta keda kritiká pa organisashonnan di derechinan humano.
Dia 31 di yüli, Kongreso salvadoreño, kontrolá pa Bukele, a aprobá e re-elekshon indefiní pa permití kontinuashon di e mandatario, kende ta gosa di hopi popularidat pa su “guera” kontra di gènnan. El Salvador “ta un kaso di preokupashon pasobra e ta mustra ku inkluso demokrasianan elektoral ku ta funshoná di manera regular i stabil por tin un deterioro rápido”, segun Rios, èks-minister di hustisia di Chile,.
E informe regional a analisá den 27 pais e indikadónan di libertat di prensa, partisipashon polítiko, estado di derechi i igualdat sosial. Na El Salvador tin “un kaida fuerte di e libertatnan” i “un deterioro” di estado di derecho i di independensia hudisial, segun Rios a indiká. Ademas, tambe nan a hasi “trampa”, manera otro paisnan, “pa konsolidá régimennan outoritario via di elekshonnan indefiní.
El Salvador awor akí tin e tasa mas haltu di personanan será na mundu, ku 85.000 detenido entre seis mion abitante, entre nan, menornan di edat, segun e reportahe. Ademas, e ta figurá entre kasonan “mas grave” di pèrdidá di independensia di hustisia, huntu ku Afganistán, Chad, Birmania i Túnesia.
Segun Rios, den último añanan e region a eksperensiá baimentu atras di demokrasia den elekshonnan straño, masha poko separashon di poder òf violashon di derechinan humano.
Nicaragua i Venezuela “tin basta tempu ku régimennan outoritario” i den Haiti “no ta topa praktikamente ningun rekisito básiko di un sistema demokrátiko”, segun Rios.
