LAS VEGAS, NEVADA, MERKA, AP.- Un salvadoreño ku ta biba na Merka di forma ilegal ta sospechoso di tira un pareha ansiano i dos persona mas mata na Nevada durante e último simannan ku a pasa.
Wilbur Martinez Guzman, di 20 aña, ta enkarselá na Carson City desde djasabra pa poseshon di artíkulonan hòrtá, robo i delitonan migratorio.
Hefe di polis di Carson City, Ken Furlong, a bisa ku outoridat federal di inmigrashon a informá ku Martinez tabata ilegalmente den e pais. servisio di Inmigrashon i Kontrol di Duana (ICE) no tabatin ningun detaye tokante e forma kon el a logra drenta Merka.
E investigashon ta sigui pendiente, i ta demasiado trempan pa komentá riba e motibu pa e asesinatonan. Presidente Donald Trump a probechá di e asesinatonan i usa esaki komo prueba pa e nesesidat pa konstruí e muraya ku el a proponé na frontera ku México.
“Kuater persona a wòrdu asesiná brutalmente pa un inmigrante ilegal ku no mester ta den nos pais”, asina Trump a bisa djaluna den un tweet. “Nos mester di un muraya fuerte”.
E asesinatonan ta un di e último krímennan ku e pais a usa pa pone atenshon riba e muraya, e konfrontashon prinsipal ku demókratanan kual a kousa e siere parsial di e gobièrnu federal.
Trump a tweet tokante e un mehikano ku a tira un polis di California mata i ku el a biba den e pais sin outorisashon.
