WILLEMSTAD.- Samir Daou ta un di e sinku miembronan nobo, ku djadumingu lo drenta Salon di Fama di FDOK.
Daou pa mas ku 40 aña a destaká den ‘bowling’, un deporte ku el a kuminsá práktika ku apénas 8 aña.
Samir Daou ta kontentu i alabes honrá di por drenta den Salon di Fama di FDOK
‘Esaki ta e máksimo sintimentu pa tur deportista ku ta dediká nan mes serio na deporte. Bo esfuerso pa bo pais i deporte asina ki ta keda honrá na e nivel di mas haltu posibel’, Daou a bisa.
E gran hungadó di ‘bowling’ aki ta mira bèk riba algun momentu ku tabata spesial p’e durante su karera.
E promé ta ora ku apénas 17 aña el a bira kampion Junior Single den Lee Evans Tournament of The Americas. Tambe e ta kòrda ku hopi orguyo ora e huntu ku Carlos Finx Jr a bira kampion den ‘doubles’ durante Weganan Panamerikano na 1995, kaminda nan a pèrdè pèrta kontra Merka. Mientras e di tres momentu ku Daou ta kòrda ku hopi orguyo, ta na 2002 ora e huntu ku Samantha Ibañez a titulá kampion den ‘mixed doubles’ durante ODESUR. Algu remarkabel ku Samir Daou ta konta di e partisipashonnan aki ta, ku hopi biaha su kontrinkantenan no tabata sa unda Kòrsou ta riba mapa. Sinembargo e yu di Kòrsou tabata bisa pa no buska mi riba mapa, pero buska mi te na promé lugánan riba e tabla di posishon.
Samir Daou awor aki no ta enfoká pa kompetí so mas, pero pa yuda prepará e siguiente generashon di ‘bowling’. Pa e miembro nobo di Salon di Fama di FDOK, ta importante pa Kòrsou sigui destaká den ‘bowling’ manera den pasado.
Dos persona importante pa Samir Daou, tambe lo bini for di eksterior pa su instalashon den Salon di Fama di FDOK.
Ta trata aki di un amigu ku tabata su persona di material, i tambe su entrenadó ku a guia den kuminsamentu di su karera.
