Kandidatonan presidensial Keiko Fujimori i Roberto Sanchez
LIMA, PERU, AFP.- E kandidato iskierdista, Roberto Sanchez, a proponé pa konta tur voto di e segundo buèlta presidensial na Perú un biaha mas. E konteo di votonan ta progresando ku spit hopi abou i ku 98% di votonan kontá, Fujimori ta ganando.
Ku 98,27% di votonan kontá, Fujimori tin 50,005% di votonan i Sanchez 49,995%, segun datonan di Ofisina Nashonal di Prosesonan Elektoral (ONPE).
Esaki ta nifiká ku Fujimori, di 51 aña, tin 1.600 voto mas, kompará ku Sanchez di 57 aña, ku mas di 18 mion voto kontá.
Sanchez a bisa ku e ke revisá i bolbe konta tur voto, spesialmente kaminda tin duda riba transparensia di e proseso.
Luis Galarreta, e kandidato pa visepresidensia di Fujimori, a rechasá e proposishon i a bisa ku su partido ta sperando e resultado final di e elekshon.
Sesenta hurado elektoral mester revisá míles di voto ku a keda kuestioná pa partido di ámbos kandidato, pa disidí si esakinan ta bálido òf nò.
Outoridatnan elektoral a bisa ku e resultadonan final por tarda entre dos pa tres siman. Sanchez a bisa ku Perú ta e úniko pais kaminda resultadonan ta tarda 30 dia pa bira konosí.
