Sanikolas e aña aki lo yega Kòrsou dia 17 di novèmber

WILLEMSTAD.- E aña aki lo ta e di 13 aña ku Fundashon Pa Nos Muchanan tin na su enkargo pa organisá  yegada di Sanikolas na Kòrsou. Huntu ku KFC, Subway, Pizza Hut, Chippie i Tele Curaçao, DMO, KTK/CPA, Stichting Johannes Bosco i masha hopi spònser, ku a pone di nan parti, e fiesta akí ta posibel.
Dia 17 di novèmber próksimo ta e gran dia ku Sanikolas huntu ku su mas di 50 pietnan ta yega Kòrsou pa bin trese un poko di alegria pa grandi i chikí. E aña aki meskos ku aña pasá lo bai tin presentashon riba 3 plenchi den sentro di siudat. Promé riba Plasa Brion, despues Plasa Jojo Coreia i despues riba Plasa Wilhelmina. Riba tur 3 plenchi lo tin un pre-show pa tur esnan ku yega for di trempan por disfrutá di dje.
E toubot di KTK huntu ku diferente yate lo drenta haf pa 8.30 di mainta. Despues di mara na Matheywerf, e parada di Sanikolas riba kabai, tur e pietnan, grupo di baile i figuranan Disney lo sali pa Plasa Brion. Pa mitar di 11 e karavana ta sigui direkshon di Punda, krusa brùg pa yega Plasa Jojo Coreia.
Ora Sanikolas i su pietnan kaba di deleitá tur hende aya na Plasa Jojo Coreia, pa 11.45 e parada ta sali direkshon di Plasa Wilhelmina kaminda Sanikolas i su pietnan lo duna un otro presentashon atrobe.
Ora e selebrashon den Otrobanda i Punda kaba e fiesta ta sigui na diferente parti di Kòrsou mas. Pa 2 or lo tin selebrashon manera ta kustumber na KFC Sta Maria, pa mitar di 5 fiesta ta sigui na plenchi di misa na Tera Kòrá i pa mitar di 6 tur kos ta kuminsá ku un pre-show na Sentro komersial SAMBIL.
Despues di e dia largu di selebrashon riba Sanikolas su promé dia na Kòrsou e i su pietnan ta bai sosegá pa despues sigui alegrá grandi i chikí ku diferente fiesta i aktividat te ku dia di su aña, ku ta 6 di desèmber.
E fiesta grandi i grátis aki pa henter pueblo di Kòrsou lo no ta posibel sin e ayudo grandi di diferente spònser ku den diferente forma a yuda pa FPNM por logra esaki. Nos ke kuminsá na yama danki na nos spònsernan prinsipal ku ta Hucor nv ku su restorantnan KFC, Subway i Pizza Hut, Chippie i TeleCuraçao huntu ku DMO, KTK/CPA, Stichting Johannes Bosco, Fria,  Sambil, KVK, St. BAB, Curoil, Fria, Auto City, Ennia, Selikor, Mangusa, Stichting Fiha, FLIS, Lions Club Curacao, Lucky Cosmetic, CVD Security, The Trader, Renaissance hotel, Fraal Import & Export, WTC, Lovers, Sektor di Kultura i deporte, Savannah carrental, CWM, Marnixschool, Mister & Miss Exclusive, Diamonds, Radio Mas, Kopodeko, Sta Barbara Resort, Parke Tropikal i Maltex.
Pueblo di Kòrsou kompleto ta invitá pa forma parti di e fiesta grandi akí na un di e diferente sitionan ku Sanikolas ta bishitá riba su promé dia  akí na Kòrsou.

SHARE

LEAVE A REPLY