WASHINGTON, AP.- Visepresidente merikano Mike Pence lo bishitá Colombia den ougùstùs segun anunsio di e mandatario suramerikano Juan Manuel Santos.
E hefe di Estado kolombiano a formulá e anunsio despues di reuní ku Pence na su residensia di Opservatorio Naval di Washington.
“E ta bishitá Colombia den ougùstùs i a pone su mes na nos disposishon pa yuda fortalesé e relashon”, asina Santos a bisa segun un komunikado.
The Associated Press a pidi un konfirmashon di Kas Blanku pero sin haña esaki inmediatamente. Colombia lo bira e promé pais latinoamerikano ku Pence ta bishitá.
Santos a realisá un bishita pa Merka ku a inkluí su reunion ku presidente Donald Trump na Kas Blanku.
Maria Claudia Lacouture, minister kolombiano di Komersio, Industria i Turismo i kende a kompaña Santos, a anunsiá ku e tabatin un kombersashon ku Wilbur Ross tokante awakati kolombiano Hass den merkado merikano.
E ofisina di Lacouture a bisa ku e eksportashonnan di e produkto aki a subi na 35 mion dòler aña pasá i ku e merkado ta representá un potensial di 2.000 mion dòler.
