DETROIT.- Jonathan Schoop ta sigui na Detroit pa sigur un temporada mas. E segunda base yu di Kòrsou a firma pa 4.5 mion dòler, loke ta konsiderablemente ménos ku e kontrakt di 6.1 mion di 2020. Echo ta si ku pa motibu di redukshon di salario en konekshon ku temporada mas kòrtiku (Corona vírus), tòg aña pasá el a kobra ménos ku e 6.1 mion.
Schoop (29) a hunga 44 wega ku Tigers den 2020. El a bati pa .278 ku ocho homerun i 23 RBI. Den 2019 ku Twins e tabata bon pa .256, 234 homerun i 59 RBI den 121 partido.
“Jonathan a hasi un tremendo impreshon temporada pasá, i nos ta kontentu di tin e bèk pa temporada 2021”, segun GM Al Avila a bisa den un komunikado. “Nos a keda impreshoná no solamente pa su resultadonan riba tereno, pero tambe pa su liderazgo i deseo ferviente pa tur dia ta den lineup. “Ta difísil pa un agente liber di un aña por tin un impakto positivo den kultura di clubhouse, pero sin duda el a logra esei temporada pasá i nos ta konta riba un kontinuashon di esei”.
Pa traha lugá pa Schoop riba e roster di 40 hungadó, outfielder Travis Demereitte a keda poné na disposishon di otro ekiponan. Demereitte tabata di 5-29 (.172) den 18 wega temporada pasá.
Schoop ta e di kuater pelotero importante ku Tigers a firma e wenter aki, despues di picher Jose Urena (un aña, $3.25 mion), outfielder Robbie Grossman (dos aña, $10 mion) i kècher Wilson Ramos (un aña, $2 mion).
“Mi ta gradisí pa e oportunidat aki pa bolbe djoin Tigers pa temporada 2021. “Nos tin un ekipo realmente bon. Temporada pasá nos a kuminsá konstruí algu spesial i nos lo hiba esaki pa e siguiente nivel e temporada ku ta bini”, segun e yu di Kòrsou a bisa.
Schoop den su karera ta bati pa .259 ku 141 homerun i 415 RBI durante di ocho temporada ku kuater ekipo. El a hunga ku Baltimore Orioles (2013-18), Milwaukee Brewers (2018), Twins (2019) i Tigers (2020).
“Un dje motibunan prinsipal pa mi bin bèk Detroit ta e manager i e coaching staff”, Schoop a bisa. “Mi ta gusta hunga pa A.J. (Hinch). Nos dos ya tabatin bon kombersashon pa mi por demostrá mi abilidat defensivo un poko mas e aña’ki”.
