WILLEMSTAD.-Kòrsou tin un Sédula moderno. Den edifisio di Kranshi na Otrobanda minister Ornelio Martina enkargá ku Maneho di Gobernashon, Planifikashon i Servisio Publiko (BPD) a splika motibunan pa kiko a bini ku un sédula modernisá.
Minister Martina a indiká ku e sédula nobo tin benefisionan práktiko, den sentido ku e lo fasilitá biahamentu entre Kòrsou i otro islanan di eks Antia. Esaki ta bira posibel pasobra e sédula modernisá tin mesun informashon manera pasport, pues e sédula modernisá tin un banchi ku informashon kodifiká. Esei ta hasi posibel ku por biaha kuné pa islanan di eks Antia sin niun problema.
E tarheta di identifikashon di Kòrsou a konosé vários kambio den tempu. A kuminsá na 1965 ku e promé tarheta di identifikashon, e tempu ei komo parti di Antia. Despues a hasi kambio na 2002 i a introdusí e sédula tamaño di un tarheta di krédito i tambe a hasi kambio na e periodo di balides di 10 pa 5 aña.
Hefe di Kranshi sra. Ruthline Haddocks a hasi entrega di e sédula nobo na minister presidènt sr. Pisas i na minister di BPD sr. Martina.
