Segun diferente médiko: Kasonan di ‘scabies’ ta oumentando na Kòrsou

WILLEMSTAD — E kantidat di kaso di scabies ta oumentando na Kòrsou, asina diferente médiko a konfirmá pa EXTRA. Scabies ta un malesa ku ta kompañá pa hopi grawatamentu ku por ta peligroso. Un di dòkternan a bai dje leu ei pa bisa ku nunka ántes den su trabou komo dòkter di mas ku 20 aña, el a topa asina tantu kaso últimamente. Na su opinion e kasonan tin di aber ku falta di higiene kresiente. E tin e sospecho ku e oumentu den kaso tin di aber ku mas indokumentado ku ta yega Kòrsou ku tur tipo di malesa. Mas aleu el a indiká ku sin e higiena nesesario ta difísil pa kombatí e síntomanan di scabies ku ta komparabel ku sarna ku por haña entre otro na kachónan.

 

Riba e pregunta di EXTRA si scabies ta pega, e médiko a indiká ku si e kondishonnan ta presente kaminda e hende ta biba, otronan den e área tambe lo pega ku e enfermedat aki. Un di e kondishonnan pa pega otro hende ta si ta drumi mesun kaminda ku mesun laken i klechi. Si e kondishonnan no ta masha higiéniko e chèns ku ta pega otro ta mas grandi, segun el a splika. Pa loke ta trata e sospecho ku e oumentu di kaso tin di aber ku indokumentadonan, prinsipalmente for di Venezuela, e médiko a splika ku tin hende ta bin ku e malesa kaba i ora nan yega aki nan ta bai keda den kondishonnan ku no ta adekuá i ta pega otro hende.

 

Luna pasá e organisashon mundial di salú WHO a bisa den un informe ku mester yega na un programa global pa kontrolá scabies, un malesa di parasit ku ta afektá 450 mion hende na mundu. E malesa ta presente prinsipalmente den paisnan di entrada mas abou. Ekspertonan den un dokumentu presentá a bisa ku scabies ta un malesa di pobresa. Nan a splika ku hendenan ku ta biba den paisnan di entrada abou, ku hopi hende riba otro i un ambiente di kalor, ta vulnerabel pa keda infektá ku loke tin e nòmber ofishal “sarcoptes scabiei mite”. E informe a bisa tambe ku scabies ta kousa problemanan di kueru i un grawatamentu formal i tin biaha insoportabel. No tin un tèst di sanger ni sikiera un aserkamentu standarisá pa yega na un diagnóstiko. “Simplemente nos no sa kon grandi e presensha di scabies ta den diferente pais”.

 

Últimamente tabatin menshon di un remedi nobo ku a usa na Fiji ku éksito konosí komo “ivermectin”.  Pero pa tin éksito mester trata henter un poblashon, asina ekspertonan ta bisa. Un di e peligernan grandi di scabies ta ku e ta krea un grawatamentu “troumátiko” loke ta pone ku ta kibra e kueru. Esei ta permití pa bakteria drenta den e herida. Esei por krea un infekshon serio ku hasta por pone bida di hende na peliger. Riba tèrmino e por kondusí na efektonan króniko di kurason i di nir.

 

Pa awor aki ta opservando e kasonan na Kòrsou di serka. Un dòkter a bisa ku mester tuma akshon mesora pa scabies no plama. Mayoria hende ta haña scabies den kontakto ku otro pero ta posibel pa haña e malu tambe via di laken, klechi i hasta muebles i tapeit. Limpiesa ta di primordial importansha den e kaso aki. Manera hendenan tabata hasi ántes ta importante pa saka kolchonnan i pone nan den solo i laga klechi, laken i slopi ku frekuensha, asina un di e dòkternan a bisa. Importante ta pa bishita un dòkter ku lo indiká kiko ta e mihó kos pa hasi. Por sierto ku maske bo kura di scabies i bo sigui den e mesun ambiente, bo por hañ’é un biaha mas si bo no tuma e medidanan di prekoushon.

SHARE

LEAVE A REPLY