WASHINGTON.- Eks presidente di Merka, Donald Trump, a deklará su mes no-kulpabel ayera tardi ante e akusashonnan históriko ku tin kontra dje manera e.o. ku el a enkabesá un operashon di konspirashon ku e intenshon pa kambia resultado di elekshon di 2020, òf a lo ménos brua e situashon. E Republikano di 77 aña a deklará na e hues magistrado Moxila Upadhyaya ku e lo deklará su mes no-kulpabel den tur akusashon kontra dje.
E akusashonnan ku ta bisa ku Trump huntu ku seis otro ko-konspirador ku ainda ta deskonosí a trata di monta e plan na final di elekshon di 2020 ta e kaso di mas serio ku tin kontra dje te awor den un total di tres kaso kriminal i ku ta un menasa pa su propio plannan pa drenta Kas Blanku bèk. Den korte el a duna di konosé ku esaki ta un dia hopi tristu pa Merka ya ku e ta konvensí ku den e kaso aki ta trata di un ‘persekushon polítiko’, algu ku hamas a sosodé den un pais demokrátiko manera Merka.
Ayera for di den oranan di mainta hopi hende, prensa merikano sigur, tabata den espektativa pa yegada di Trump den korte. E èks presidente a yega korte te den oranan di atardi den un karavana enkabesá pa Servisio Sekreto Merikano ku ta un entidat ku ta protehá tur presidente i èks presidente merikano.
Trump tin otro kargonan tambe ku ta warda pa e duna kuenta i rason riba nan, manera e.o. ku el a instigá gruponan loyal na su persona pa a drenta Kapitolio i kousa destrukshon dia 6 di yanüari. Ademas e no por skapa di e kantidat di dokumentonan klasifiká/sekreto ku el a saka for di Kas Blanku i bai pone na su kas.
