WASHINGTON, MERKA, AFP.- E sektor bankario di Merka ta stabilisando despues ku Silicon Valley Bank (SVB) i Signature Bank a deklará bankrut i sakudí e industria, segun indikashon di e sekretaria di Tesoro Janet yellen, den un konferensia djamars.
Merkadonan a ekstendé nan ganashinan den Merka i tambe Europa, bahando tur temor pa un krísis finansiero, despues ku Reserva Federal di Merka i otro bankonan sentral importante a kuminsá ku un esfuerso kordiná e siman aki pa fasilitá akseso di fiadónan na likides.
E deklarashonnan di bankrut a provoká un krísis di konfiansa, kaminda mayoria kliente di bankonan di tamañonan similar a retirá nan sèn i depositá esaki den institushonnan mas grandi.
Despues di e deklarashon di bankrut di SVB, Tesoro, Reserva Federal i Korporashon Federal di Seguro di Depósito a establesé plannan pa garantisá ku su klientenan ta haña akseso na nan depósitonan. A anunsiá un eksepshon similar pa Signature Bank.
