KHARTOUM, SUDAN, AFP.- Forsanan sudanes a mata shete manifestante djaluna. Esaki ta un di e dianan di mas violento den un serie di protestá kontra un gobièrnu militar, segun indikashon di dòkternan. Hefenan di seguridat a bisa ku lo buska tur esnan responsabel ku a kousa e “káos” aki.

E esenanan violento a sosodé promé ku bishita di diplomátikonan merikano, segun Washington ta purba haña un solushon pa kaba ku lunanan largu di krísis den e nashon den Nort Afrika.

E kantidat di manifestantenan ku a muri ta 71, desde ku militarnan a gara poder di gobièrnu riba 25 di òktober aña pasá.

E moveshon militar aki a kousa kritiká internashonal, i a kanselá e transishon sivil desde ku e presidente outókrata Omar al-Bashir a wòrdu kitá di poder.

Tres manifestante a muri djaluna, despues ku milisianan di e kònsel militar a tira riba nan, segun indikashon di e página di Facebook di e ministerio di salubridat.

Despues di esaki, kuater manifestante mas a muri “durante un masakre di outoridatnan militar ku a purba disolvé e protestanan”, segun indikashon di Komité Sentral di Dòkter di Sudan.

 

LAGA UN KOMENTARIO

Please enter your comment!
Please enter your name here