DEN HAAG.-Ulanda a lanta den un otro nivel di preokupashon despues ku a bira konosí ku a tuma desishon pa pone èkstra vigilansia rondó di minister presidènt demishonario Mark Rutte, asina e agensia di notisia AFP ta informa. Tin indikashon ku lo ke sekuestrá Rutte òf kometé un atentado kontra di dje. Kanalnan di notisia ulandes tambe ta menshoná esaki komo notisia di último ora, indikando ku ta trata di un situashon basta serio.

Instansianan ofisial di gobièrnu no ta dunando niun komentario sinembargo ta bisto ku direpente tin hopi protekshon rondó di e promé minister ulandes. Ta konosí ku Rutte semper ta move riba su baiskel den Den Haag entre su trabou i su kas. Nunka e ta gusta asuntu di protekshon i seguridat. Por a tuma nota ku unidatnan speshal di polis i tambe agentenan di seguridat diplomátiko i real ta vigilando Rutte.

Kanalnan di notisia ulandes ta kere ku e menasa kontra Rutte lo por ta bini di e huki di krímen organisá ku ke krea spantu i destabilisa òrdu den e pais.

Parse ku a nota e asina yamá ‘spotters’ den serkania di e minister presidènt. Esaki mesora a lanta e preokupashon pa loke a pasa ku e abogado Wiersum i despues Peter R. De Vries. Ámbos kriminalnan a laga likidá abiertamente kousando hopi spantu tur kaminda.

LAGA UN KOMENTARIO

Please enter your comment!
Please enter your name here