Ku mas kompania di aviashon ku ta stòp nan buelonan pa Venezuela, pokopoko pero sigur e aeropuerto internashonal Maiquetia ta kedando bashí.
CARACAS (AFP).- Den fin di siman último seis aerolínea a kanselá nan konekshonnan ku Venezuela, despues di un atvertensia di Merka na aviashon sivil riba un “oumento di aktividat militar” den kuadro dje operashonnan norteamerikano den Karibe. E kompania spañó Iberia, e portugues TAP, e kolombiano Avianca, e brasilero GOL, e chileno Latam djasabra a komuniká e suspenshon di nan buelonan, segun e asosiashonnan di kompanianan di aviashon (ALAV) i di agensianan di biahe (AVAVIT). Djadumingu, Turkish Airlines a informá di ta kanselá su buelonan entre 24 i 28 di novèmber.
ALAV na un promé instante a inkluí Caribbean Airlines, pero e kompania di Trinidad for di sèptèmber ya a stòp di bula pa Venezuela.
Ta e intenshon di Merka pa awe deklará komo organisashon terorista un supuesto kartel narkotrafikante enkabesá a e presidente Nicolás Maduro. Ya nan a mobilisá pa Karibe e barkunan di guera di mas grandi na mundu ku ta transportá avionnan di guera i esaki pa operashonnan anti droga, ku Maduro ta denunsiá komo un “menasa” pa fòrsa su gobièrnu pa kai. Te ku ayera a konta 83 morto den binti kaso di bombardeo di supuesto lanchanan di droga.
Atministrashon Federal di Aviashon (FAA) djabièrnè a hasi un yamada riba avionnan ku ta sirkulá den espasio aéreo venezolano pa “tene hopi prekoushon” debí na “empeoramentu dje situashon di seguridat i e oumento di aktividat militar den serkania di Venezuela”.
AVAVIT, Vicky Herrera, Copa, Air Europa, PlusUltra i Wingo no a pronunsiá nan mes ainda riba nan frekuensia di buelo pa i for di Venezuela. E kompanianan venezolano Laser, Avior i Estelar, kualnan ta bula internashonal, a informá ku nan ta operá normalmente.
